मराठा आरक्षणावरुन गोपीचंद पडळकर-रोहित पवार यांच्यात सोशल मीडिया वॉर पहायला मिळालं. पडळकर थेट रोहित पवारांच्या आजोबांचा उल्लेख केला.
आरक्षणाच्या मुद्यावरून राष्ट्रवादी काँग्रेसचे आमदार रोहित पवार आणि भाजपचे आमदार गोपीचंद पडळकर यांच्यात शाब्दिक चकमक उडाल्याचे पाहण्यास मिळाले. आपल्या जातीयवादी आजोबांनीच मराठा समाजाला दिलेले आरक्षण घालवले, अशी टीका पडळकर यांनी एक्सवरून केली.
रोहित पवार हे सध्या युवा संघर्ष यात्रेवर आहेत. या यात्रेच्या निमित्ताने सोमवारी त्यांनी एक्सवरून एक पोस्ट शेअर केली. युवा संघर्षयात्रेत साडे चारशे किमी पायी चालल्यानंतर एक गोष्ट जाणवली ती म्हणजे पूर्वीच्या काळात मराठेशाही एका ‘अनाजीपंता’ने संपवली. आताच्या काळामध्ये ‘महाराष्ट्र-धर्म’ संपवण्याचे काम एक आधुनिक ‘अनाजीपंत’ करत आहे, असे ते म्हणाले होते. या पोस्टला पडळकर यांनी प्रत्युत्तर दिले. स्वराज्याची स्थापना आठरापगड जातींनी केली. परंतु त्यावर घाव घालणारे सुर्याजी पिसाळ आणि गणोजी शिर्के होते. तर देवेंद्र फडणवीस यांनी गरीब मराठा समाजाला दिलेले आरक्षण घालवणारे आपले जातीयवादी आजोबाच आहेत, असे ते म्हणाले.
