गृहपाठ केला नाही म्हणून दुसऱ्या इयत्तेतील विद्यार्थीनीला कानातून रक्त निघेपर्यंत मारल्याची दुर्दैवी घटना नागपुरातील सोमलवार शाळेत घडली आहे. याप्रकरणी पिडीत विद्यार्थीनीच्या पालकांनी पोलिसात तक्रार दाखल केली असून चौकशीअंती गुन्हा दाखल करण्यात आलाय.
नागपुरातील रामदासपेठ परिसरातील सोमलवार इंग्रजी प्राथमिक शाळेत इयत्ता दुसरीत शिकणाऱ्या एका विद्यार्थीनीने शिक्षकांनी सांगितलेला गृहपाठ केला नव्हता. त्यामुळे संतापलेल्या शिक्षकाने सदर विद्यार्थीनीला इतक्या जोरात मारले की, तिच्या कानाला जखम होऊन त्यातून रक्त येऊ लागले. या घटनेनंतर शाळेतील एका शिक्षीकेने विद्यार्थीनीच्या आईला फोन करून याबात कळवले. तिची आई शाळेत पोहचली तेव्हा मुलगी खूप रडत होती. त्यानंतर मुलीच्या काकांनी तिला धीर देत प्रेमाने विचारणा केली असता पिराजी मायगु चाचेरकर (वय. 40 रा. गोकुळपेठ) या शिक्षकाने होमवर्क न केल्याच्या कारणावरून तिला अमानुष मारहाण केल्याचे धक्कादायक हकीकत समजली. यापूर्वी आरोपी शिक्षकाने इतर विद्यार्थीनींना देखील अशा प्रकारची मारहाण केल्याची माहिती पुढे आली. या घटनेनंतर पिडीत विद्यार्थीनीला तिचे पालक घरी घेऊन गेले. परंतु, घरी गेल्यावरही तिचा कान दुखत होता आणि ती ओक्साबोक्शी रडत होती. अखेर तिला दवाखान्यात नेण्यात आले असता इतक्या छोट्या मुलीला झालेली अमानुष मारहाण पाहून डॉक्टरांनी देखील आश्चर्य व्यक्त केले.
अखेर मुलीच्या आईने याप्रकरणी आरोपी शिक्षकाच्या विरोधात सीताबर्डी पोलिसात तक्रार केली. पोलिसांनी आरोपी शिक्षक चाचेरकर याच्या विरोधात अल्पवयीन न्याय (मुलांची काळजी व संरक्षण) कायद्याअंतर्गत गुन्हा नोंदविला असून पुढील तपास सुरू आहे. दरम्यान याप्रकरणी सीताबर्डी पोलिसांशी संपर्क केला असता त्यांनी विद्यार्थीनीला मारहाण झाल्याचे मान्य केले. परंतु, पिडीतेच्या कानातून रक्त आल्याचा दावा फेटाळून लावला. तसेच काही कायदेशीर अडचणींमुळे आरोपी शिक्षकाला अटक करू शकत नसल्याचे त्यांनी सांगितले.
शिक्षकावर कारवाई करणार- सोमलवार
यासंदर्भात शाळेचे संचालक प्रकाश सोमलवार यांनी सांगितले की, घडलेली घटना अतिशय गंभीर असून अशाप्रकारे विद्यार्थ्यांना मारहाण करणे आमच्या शिक्षण संस्थेची संस्कृती नाही. आरोपी शिक्षक जिल्हा परिषद शाळेतून अतिरिक्त (सरप्लस) झाल्याने 2 वर्षांपूर्वी आमच्या संस्थेत रुजू झालेत. या शिक्षकाच्या विरोधात यापूर्वीही काही तक्रारी आल्या होत्या. त्याची चौकशी सुरू असतानाच हा प्रकार घडला आहे. याप्रकरणी योग्य ती कायदेशीर कारवाई केली जाईल अशी ग्वाही सोमलवार यांनी दिली.
