पुणे मुंबई एक्स्प्रेस वेवरुन आज मुंबईकडे जाणाऱ्या प्रवाशांसाठी महत्त्वाची बातमी आहे. चिखले ब्रिज येथील कामामुळं मुंबई मार्गिका सात तास बंद राहणार आहे.
यशवंतराव चव्हाण मुंबई पुणे द्रुतगती मार्गावर मुंबई वाहिनीवर मुंबई रेल्वे विकास कॉर्पोरेशन लि. तर्फे पनवेल-कर्जत दुहेरी मार्ग उपनगरीय रेल्वे कॉरिडोरचे काम किमी ०७.५६० (चिखले ब्रिज) येथे दिनांक ९ नोव्हेंबर म्हणजेच आज सकाळी साडे दहा ते सायंकाळी साडेपाच या वेळेत करण्यात येणार आहे. मुंबई रेल्वे विकास कॉर्पोरेशन लि. तर्फे करण्यात येणाऱ्या वरील नियोजित कामाचे वेळी मुंबई पुणे द्रुतगती मार्गावर मुंबई वाहिनीवर सर्व प्रकारची वाहने (हलकी व जड अवजड वाहने) यांची वाहतूक बंद करण्यात येणार आहे, अशी माहिती देण्यात आली आहे.
पर्यायी मार्ग कोणते ?
१. मुंबई पुणे द्रुतगती मार्गावरून पुणे बाजू कडून मुंबई बाजूकडे येणारी वाहने मुंबई लेन कि.मी. ९.६०० पनवेल एक्झिट वरून मुंबई पुणे राष्ट्रीय महामार्ग क्र. ४८ या मार्गावर करंजाडे मार्गे कळंबोली अशी वळविण्यात येतील.
२. मुंबई पुणे राष्ट्रीय महामार्ग क्र. ४८ या मार्गावरून पुणे बाजू कडून मुंबई बाजूकडे येणारी वाहने शेडुंग फाट्यावरून बोर्ले टोल नाक्याकडे न येता सरळ पनवेलच्या दिशेने मार्गस्थ करण्यात येतील.
३. मुंबई पुणे द्रुतगती मार्गावरून पुणे बाजू कडून मुंबई बाजूकडे येणारी हलकी वाहने कि.मी. ३९.८०० खोपोली एक्झिट वरून वळवून मुंबई पुणे राष्ट्रीय महामार्ग क्र. ४८ या मार्गावरून मार्गस्थ करण्यात येतील.
यशवंतराव चव्हाण मुंबई पुणे द्रुतगती मार्गावर गँट्री बसवण्याचा कामानिमित्त गेल्या काही दिवसांपासून विशेष ब्लॉक घेतले जात होते. महाराष्ट्र राज्य रस्ते विकास महामंडळाकडून मुंबई आणि पुणे मार्गिकांवर वेगवेगळ्या वेळेत अर्ध्या तासांचा ब्लॉक घेण्यात आला होता.
दरम्यान, प्रवासासाठी बाहेर पडल्यानंतर वाहतूक बंद असल्यानं मनस्ताप होऊ नये यासाठी वाहनधारकांनी मुंबई पुणे महामार्गावरील वाहतुकीतील बदलांबद्दल माहिती घेतल्यानंतर घराबाहेर पडणं आवश्यक आहे. दिवाळी असल्यानं गावी जाणाऱ्यांची संख्या देखील मोठी असल्यानं वाहनधारकांनी प्रशासनानं वाहतुकीबाबत केलेले बदल लक्षात घेऊन प्रवासाचं नियोजन केल्यास त्यांना मनस्ताप होणार नाही.
