हत्ती हुसकावण्यासाठी गेलेल्या वन कर्मचारी आमि ग्रामस्थांच्या समूहावर हत्तीने प्रतीहल्ला केल्याने या हल्ल्यात वन कर्मचारी प्रकाश गोविंद पाटील (वय ५४) हे ठार झाले आहेत. घाटकरवाडी येथील जंगलामध्ये आज सकाळी ११ च्या सुमारास घडली. ही घटना जिल्ह्यातील आजरा तालुक्यात घडली आहे.
गेली १० वर्ष हत्तीचा बंदोबस्त करण्याची मागणी ग्रामस्थांमधून होत असतानाच गेले आठ दिवस आजरा तालुक्यातील घाटकरवाडी परिसरात हत्ती धुमाकूळ घालत होता. या हत्तीला हुसकावण्याची मोहीम आज वनविभाग आणि ग्रामस्थांनी हाती घेतली होती. सकाळी ९ वाजल्यापासून हत्तीला हुसकवण्यासाठी वन विभागातील कर्मचारी प्रयत्न करत होते. यावेळी सकाळी ११ वाजण्याच्या सुमारास हत्ती बाजूला गेला आहे, असं समजून त्याच्या पाठीमागून जात असताना अचानकपणे गर्द झाडीतून हत्ती बाहेर आला आणि हुसकावण्यासाठी गेलेल्या ग्रामस्थ व वनविभागाच्या कर्मचाऱ्यांवर हत्तीने हल्ला केला.
हत्तीने केलेल्या हल्ल्यात वनकर्मचारी प्रकाश गोविंद पाटील यांना हत्तीने सोंडेत पडकून गरगर फिरवून जमिनीवर जोरात आपटले. यावेळी पाटील यांचा जागीच मृत्यू झाला. तर हत्ती चेकालेला पाहून वन कर्मचारी आणि गावकरी तेथून पळून गेले. थोड्यावेळाने हत्ती पुन्हा झुडपात गेल्यानंतर वन विभागाच्या कर्मचाऱ्यांनी प्रकाश पाटील यांच्याजवळ गेले असता त्यांचा मृत्यू झाल्याचे समोर आले. यामुळे आज वन विभागाच्या कर्मचाऱ्यालाच मृत्यूला सामोरे जावे लागल्याने आता तरी हत्तीचा बंदोबस्त होणार का? असा प्रश्न सर्वसामान्यांकडून उपस्थित केला जात असून घबराटीचे वातावरण निर्माण झाले आहे.
