इस्त्रोच्या चांद्रयान-3 मोहिमेतली महत्त्वाचा टप्पा आज, गुरुवारी पार पडला. चांद्रयानातील प्रॉपल्शन मॉड्यूल आणि विक्रम लँडर हे एकमेकांपासून वेगळे झाले आहेत. आता विक्रम लँडर चंद्राच्या पृष्ठभागाच्या दिशेने प्रवास करेल, तर प्रॉपल्शन मॉडेल चंद्राच्या भोवती फिरत राहणार आहे. इस्रोने ट्विटर संदेशाच्या माध्यमातून याबाबत माहिती दिली.
गेल्या 14 जुलै रोजी चांद्रयानाचं यशस्वी प्रक्षेपण करण्यात आले होते. आपल्याला पृथ्वीपासून चंद्रापर्यंत सुरक्षितपणे पोहोचवल्याबद्दल लँडर मॉड्यूलने प्रॉपल्शन मॉड्यूलचे आभार मानले. आता हे मॉड्यूल प्रॉपल्शनपासून वेगळे झाले. यानंतर आता लँडर मॉड्यूल हे चंद्राच्या पृष्ठभागाच्या आणखी जवळ पोहोचलं असून, 18 ऑगस्ट रोजी दुपारी 4 वाजेच्या सुमाराला डीबूस्टिंग प्रक्रिया पार पडणार आहे. विक्रम लँडरच्या आतमध्येच प्रज्ञान रोव्हर आहे. आगामी 23 ऑगस्ट रोजी विक्रम लँडर चंद्रावर उतरल्यानंतर रोव्हर बाहेर येईल, आणि चंद्राच्या पृष्ठभागावर फिरुन माहिती गोळा करेल.
इस्रोने सांगितले की, आता चंद्राभोवती भारताचे 3 उपग्रह असून यामध्ये चांद्रयान-1, चांद्रयान-2 आणि चांद्रयान-3 च्या प्रॉपल्शन मॉड्यूलचा समावेश आहे. लँडर मॉड्यूलला चंद्रापर्यंत पोहोचवल्यानंतर प्रॉपल्शन मॉड्यूलचे काम संपणार नाही. आता पुढील कित्येक महिने किंवा वर्षांपर्यंत हे मॉड्यूल चंद्राभोवती फिरत राहील. यामध्ये असलेल्या एसएचएपीई उपकरणाच्या माध्यमातून हे पृथ्वीच्या वातावरणाचा स्पेक्ट्रोस्कोपिक अभ्यास करेल. तसेच, पृथ्वीवरील ढगांच्या माध्यमातून ध्रुवीकरणातील फरक याचा अभ्यास देखील हे करणार आहे. यातून मिळालेल्या माहितीचा वापर हा मानवी वसाहतीसाठी योग्य असणाऱ्या ग्रहांचा शोध घेण्यासाठी उपयोगी ठरणार आहे. बंगळुरूमधील यू. आर. राव सॅटेलाईट सेंटर आणि इस्रोने संयुक्तपणे या उपकरणाची निर्मिती केली आहे.
