राष्ट्रीय तपास यंत्रणेने (एनआयए) आज, बुधवारी खलिस्तानी आणि गुंडांच्या नेटवर्कविरोधाक कारवाईचा बडगा उभारलाय. एनआयएने पंजाब, राजस्थान, दिल्ली-एनसीआर, हरियाणा, उत्तराखंड आणि उत्तरप्रदेश या 6 राज्यांमध्ये 51 ठिकाणी छापे टाकले आहेत. खलिस्तानी दहशतवादी हरदीप सिंह निज्जरच्या हत्येवरून भारत आणि कॅनडामध्ये वाद सुरू असताना एनआयएने ही कारवाई सुरू केली आहे.
यासंदर्भातील माहितीनुसार एनआयएने पंजाबमध्ये सुमारे 30 ठिकाणी आणि हरियाणामध्ये 4 ठिकाणी छापे टाकले आहेत. तर उत्तरप्रदेशातील पिलीभीत, लखीमपूर खेरी, अलीगढ, सहारनपूर येथे छापे टाकले आहेत. पंजाबमधील फिरोजपूर, भटिंडा, लुधियाना, मोगा, फरीदकोट, पटियाला, बर्नाला आणि मानसा येथे छापे टाकण्यात आले आहेत. भटिंडा येथे बुधवारी सकाळी 6 वाजता एनआयएच्या 2 पथके रामपुरा आणि मोड मंडी येथे पोहोचली. हे पथक जेठुके गावात गुरप्रीत सिंग उर्फ गुरीच्या घराची झडती घेत आहे. गुरी हा भटिंडा पोलिसांना खुनासह अनेक गुन्ह्यांमध्ये वाँटेड आरोपी आहे. हॅरी मोरच्या घरी एक टीम पोहोचली आहे. हॅरीचेही अनेक प्रकरणांमध्ये नाव आहे.
एनआयएचे पथक मध्यरात्री राजस्थानच्या 13 जिल्ह्यांमध्ये पोहोचले होते. राजस्थानातील 13 जिल्ह्यांमध्ये हनुमानगड, झुंझुनू, गंगानगर, जोधपूर, बिकानेर, जैसलमेर, सीकर, पाली, जोधपूर ग्रामीण, बारमेर, कोटा ग्रामीण, भीलवाडा आणि अजमेरमध्ये शोध घेत आहेत. एनआयए ज्या ठिकाणी छापे टाकत आहे तेथील लोकांच्या बँक खात्यातील व्यवहारांचीही चौकशी केली जात आहे. अलीकडेच राजस्थानमधील 10 हून अधिक जिल्हे खलिस्तानींच्या नव्या नकाशात दाखवण्यात आले आहेत. हरियाणातील सिरसा, फतेहाबाद, सोनीपत आणि रोहतक येथे एजन्सीने छापे टाकल्याचे वृत्त आहे, ज्यात गँगस्टर हिमांशू भाऊच्या घरासह इतर ठिकाणे आहेत. खलिस्तानी दहशतवादी, अंमली पदार्थ विक्रेते आणि गुंड यांचा संबंध तोडण्यासाठी ही कारवाई करण्यात येत आहे. सिरसाच्या भीमा गावात एनआयएचा छापा पडला आहे. हे गाव पंजाबला लागून आहे. ज्या व्यक्तीच्या घरावर छापा टाकण्यात आला तो बाऊन्सर असून तो परदेशी नंबरवर नियमित कॉल करत असल्याचे सांगण्यात येत आहे. गेल्या 7 दिवसांत खलिस्तानी नेटवर्कविरुद्ध एनआयएची ही दुसरी मोठी कारवाई आहे. यापूर्वी 21 सप्टेंबर रोजी एनआयएने पंजाब आणि हरियाणामधील गँगस्टर गोल्डी ब्रारशी संबंधित एक हजाराहून अधिक ठिकाणांवर छापे टाकले होते.
