२५० वर्षांपूर्वीच्या जुन्या काशाच्या भांड्याची विक्री करून त्याद्वारे २०० कोटी रुपये मिळवून देतो, असे सांगत चौघांनी एका शेतकऱ्याची १ कोटी १३ लाख रुपयांची फसवणूक केली आहे. या प्रकरणी रफिक इस्माईल तांबोळी (रा. लोहगाव, पुणे), सिराज शेख उर्फ पानसरे (रा. कोंढवा), उमेश उमापुरे (रा. कासारशिरसी, ता. निलंगा, जि. लातूर) आणि धनाजी पाटील (रा. सांगली) अशी गुन्हा दाखल झालेल्यांची नावे आहेत. याबाबत राजेंद्र बापूराव शेलार (रा. सणसर, ता. इंदापूर) यांनी बारामती शहर पोलिस ठाण्यात फिर्याद दिली. त्यानुसार चौघांविरोधात फसवणूकीचा गुन्हा दाखल करण्यात आला आहे.
तक्रारीनुसार, फिर्याद देणाऱ्या शेतकऱ्याने विज्ञान आणि व्यवस्थापन या विषयांत पदव्युत्तर पदवी घेतलेली आहे. त्याने आरोपींना पैसे देण्यासाठी जमीन विकून आणि गहाण ठेवून इलेक्ट्रिकची ताकद मोजण्यासाठी संबंधित धातूंच्या वैज्ञानिक चाचण्या केल्या आहेत. इस्रो आणि नासा या संस्थांना गरजेचे असलेले विशेष विद्युत गुणधर्म असलेले २५० वर्षांचे जुने कांस्याचे भांडे आपण दिले, तर आपल्याला २०० ते २५० कोटी रुपये मिळतील, असे आरोपींनी फिर्यादी शेतकऱ्याला सांगितले. असे सांगून वेळोवेळी पैसे घेऊन त्यांनी शेतकऱ्याची १.१३ कोटी रुपयांची फसवणूक केली असल्याचे फिर्यादीत नमूद करण्यात आले आहे.
मिळालेल्या माहितीनुसार, २०१४ ते २०१६ च्या दरम्यान रफिक तांबोळी यांच्याशी फिर्यादीची ओळख झाली होती. त्यावेळी त्याने आळंदी येथील लिटिगेशनचा प्लॉट असून तो क्लिअर करण्यासाठी पैशाची आवश्यकता असल्याचे सांगितले होते. प्लॉटची विक्री झाल्यावर त्यातून ५० कोटी रुपये मिळणार असून त्यातील ४ कोटी रुपये देतो, असे आमिष त्याने दाखवले. त्यामुळे फिर्यादीने त्याला १ लाख रुपये रोख दिले. १५ दिवसानंतर तांबोळी याने पुन्हा पैशाची मागणी केली. त्यावेळी त्याला २ लाख रुपयांची मदत करण्यात आली. ४ कोटींचे आमिष दाखवत त्याने पुन्हा पैशाची मागणी केल्यावर शेलार यांनी त्याच्या खात्यावर ४ लाख ६५ हजार रुपये भरले.
त्यानंतरही रफिक आणि त्याची पत्नी आतिया या दोघांच्या खात्यावर १२ ते १७ लाख रुपये भरण्यात आले. २०१७ मध्ये फिर्यादीने पैसे परत मागितले असता त्याने माझ्याकडे काशाचे भांडे असून ते २५० वर्षांपूर्वीचे आहे. त्यात वीज पडून इलेक्ट्रीक पॉवर तयार झालेली आहे. हे भांडे नासा, इस्त्रोसारख्या संस्था विकत घेतात. ही रक्कम २०० ते ३०० कोटी असेल. परंतू त्यात किती पॉवर निर्माण झाली आहे, याची पडताळणी करण्यासाठी मला फी भरावी लागेल. सध्या माझ्याकडे पैसे नाहीत. तुम्ही मदत करा, असे सांगितले. त्याला भुलून फिर्यादीने सणसर येथील गट क्र. ६३ मधील ९० गुंठे जमीन विकत त्याला ९० लाख रुपये दिले. त्यानंतर तो मोबाईल बंद करून पसार झाला.
