पंजाबच्या फिरोजपूर जिल्ह्यात सीमा सुरक्षा दलाने (बीएसएफ) 2 पाकिस्तानी तस्करांना अटक केलीय. त्यांच्याकडून 29.26 किलो हेरॉईन जप्त करण्यात आली आहे. दरम्यान या परिसरात बीएसएफने शोध मोहिम हाती घेतली आहे.
यासंदर्भातील माहितीनुसार बीएसएफचे जवान गस्तीवर होते. यावेळी सतलज नदीच्या किनाऱ्यावरील गट्टी मातर गावाजवळ पहाटे 2.45 वाजता पाकिस्तानी तस्कर भारतीय सीमेत प्रवेश करताना दिसले. सैनिकांनी सुरुवातीला त्यांना वॉर्निंग दिली, परंतु त्यांच्या प्रत्युत्तरात धोका ओळखून बीएसएफ जवानांनी तस्करांवर गोळीबार सुरू केला. तस्करांच्या बाजूनेही प्रत्युत्तरादाखल गोळीबार करण्यात आला. दरम्यान, एका तस्कराच्या हातावर गोळी लागली. यानंतर बीएसएफने 2 तस्करांना अटक केली. या तस्करांची तपासणी केली असता त्यांच्याकडील निळ्या रंगाच्या ड्रममध्ये एकूण 26 पॅकिटे सापडली. या पाकिटांचे वजन 29.26 किलो आहे. दरम्यान प्राथमिक उपचारानंतर जखमी तस्कराला सिव्हिल हॉस्पिटलमध्ये दाखल करण्यात आले आहे. दरम्यान परिसरात अजूनही शोधमोहीम सुरू आहे.
