वैद्यकीय सेवा ही अत्यंत अत्यावश्यक अशी सेवा आहे. वैद्यकीय अभ्यास करणाऱ्या विद्यार्थ्यांनी समर्पित भावनेने राज्याच्या कानाकोपऱ्यात आवश्यकता असेल तेथे वैद्यकीय सेवा दिली पाहिजे. तसेच समाजासाठी आपण काहीतरी देणे लागतो, हे सतत लक्षात ठेवून समाजाकडे चौकस बुद्धीने पाहिलं पाहिजे. येणाऱ्या आव्हानांचा सामना करत आणि धीरोदात्तपणे प्रत्येक संकटाला तोंड देत विद्यार्थ्यांनी आपली सेवाभावी वृत्ती जोपासली पाहिजे, असे प्रतिपादन ज्येष्ठ समाजसेवक डाॅ. प्रकाश आमटे यांनी व्यक्त केले.
मनपा आयुक्त इकबाल सिंह चहल आणि अन्य मनपा प्रशासकीय अधिकारी यांच्या मार्गदर्शनानुसार टोपीवाला राष्ट्रीय वैद्यकीय महाविद्यालयातील विद्यार्थ्यांसाठी अभ्यासक्रमासोबतच व्यक्तिमत्व विकासाच्या अनुषंगाने विविध सांस्कृतिक कार्यक्रमांचे व स्पर्धांचे आयोजन देखील करण्यात येते. याच अंतर्गत दरवर्षी मराठी महिन्यांमधील ‘श्रावण’ महिन्यात ‘श्रावणसरी’ या उत्सवाचे आयोजन केले जाते. यानुसार या वर्षी देखील या कार्यक्रमाचे आयोजन नुकतेच करण्यात आले. यामध्ये वैद्यकीय विद्यार्थ्यांनी आपापला अभ्यास सांभाळून मोठ्या उत्साहाने सहभाग नोंदविला.
यंदाच्या ‘श्रावणसरी’ उत्सवादरम्यान ज्येष्ठ समाजसेवक डाॅ. प्रकाश आमटे व डॉ. मंदाकिनी आमटे यांची प्रकट मुलाखत डॉ. शुभम हिरेमठ आणि विद्यार्थीनी भक्ती शिंदे यांनी घेतली. यावेळी बोलताना डॉ. प्रकाश आमटे यांनी सामाजिक क्षेत्रातील आपली वाटचाल आणि प्रवास उलगडून सांगितला. तसेच एखाद्या वैद्यकीय महाविद्यालयामध्ये तेही गेल्या ३८ वर्षांपासून मराठीचा गौरव करण्यासाठी विविध उपक्रम राबविले जातात याचे कौतुक आणि अभिमान असल्याच्या भावना डॉ. प्रकाश आमटे यांनी व्यक्त केल्या. याप्रसंगी विद्यार्थ्यांना मार्गदर्शन करताना डॉ. आमटे म्हणाले.
बा.य.ल. नायर रुग्णालय व टोपीवाला राष्ट्रीय वैद्यकीय महाविद्यालयाचे अधिष्ठाता डॉक्टर सुधीर मेढेकर म्हणाले की, बा. य. ल. नायर रुग्णालयात वैद्यकीय विद्यार्थ्यांच्या पुढाकाराने ‘उत्सव महाराष्ट्राच्या परंपरेचा’ या मध्यवर्ती संकल्पनेवर आधारित ‘श्रावणसरी’ या दोन दिवसीय उत्सवादरम्यान मराठी भाषेचा गौरव करणारे विविध कार्यक्रम आयोजित करण्यात आले. याच अंतर्गत मराठी भाषा आणि संस्कृतीची घट्ट नातं असणारी दिंडी आणि इतर अनेक कार्यक्रम आयोजित करण्यात आले. विशेष म्हणजे मराठी भाषेला समर्पित दोन दिवसीय उत्सवाचे आयोजन करणारे नायर वैद्यकीय महाविद्यालय हे महाराष्ट्रातील एकमेव वैद्यकीय महाविद्यालय आहे.
बा. य. ल नायर रुग्णालय व टोपीवाला राष्ट्रीय वैद्यकीय महाविद्यालयात गेल्या ३८ वर्षांपासून ‘श्रावणसरी’ या उपक्रमाचे आयोजन करण्यात येते. यामध्ये मराठी नाट्य स्पर्धा, काव्य मैफिल, नृत्य स्पर्धा, भजन, गायन यासह विविध अविष्कारातून मराठीचा जागर करण्यात येतो. विशेष म्हणजे कार्यक्रमादरम्यान दोन दिवसांमध्ये आहार देखील मराठी पद्धतीचा असतो. यामध्ये पुरणाची पोळी, श्रीखंड, मोदक, झुणका भाकरी असे पदार्थ असतात.
एवढेच नव्हे तर विद्यार्थी-विद्यार्थिनी यांचा पोशाख देखील या दोन दिवसांच्या कालावधीत प्राधान्याने महाराष्ट्रीयन पद्धतीचा असतो. या संपूर्ण कार्यक्रमाचे नियोजन व आयोजन हे वैद्यकीय शिक्षण घेणारे विद्यार्थीच करत असतात. विशेष म्हणजे कार्यक्रमाचा खर्च देखील विद्यार्थ्यांच्या वर्गणीतून करण्यात येतो. यंदा देखील अत्यंत दिमाखात सलग दोन दिवस श्रावण सरी हा उत्सव पार पडला.
दरम्यान भारतीय पोलीस सेवेतील अधिकारी तेजस्वी सातपुते यांनी सांगितले की, वैद्यकीय महाविद्यालयात मराठी भाषेचा जागर होणे माझ्यासाठी सुखद धक्का आहे. भाषा, साहित्य आणि कला या तिन्ही बाबींचा संगम या ठिकाणी दिसून आला. विद्यार्थ्यांच्या व्यक्तिमत्व विकासासाठी अशा कार्यक्रमाचा निश्चितच फायदा होतो, असे सांगत त्यांनी वैद्यकीय महाविद्यालयातील विद्यार्थ्यांना शुभेच्छा दिल्या.
