आगामी राज्यसभा निवडणुकीसाठी भाजपने १४ उमेदवारांची घोषणा केली आहे. यामध्ये उत्तरप्रदेशातील नेत्यांची संख्या सर्वाधिक आहे. तसेच दोन महिला नेत्यांनाही उमेदवारी जाहीर करण्यात आली आहे.
आगामी राज्यसभा निवडणुकीसाठी भाजपने रविवारी १४ उमेदवारांची घोषणा केली. या यादीत दोन महिला नेत्यांचा समावेश आहे. उत्तर प्रदेशातून सर्वाधिक सात उमेदवारांची घोषणा करण्यात आली आहे. यात काँग्रेसमधून आलेले आर. पी. एन. सिंह यांना उमेदवारी जाहीर झाली असून पक्षप्रवक्ते सुधांशू त्रिवेदी यांनाही पुन्हा राज्यसभेची लॉटरी लागली आहे.
महाराष्ट्रातील राज्यसभा उमेदवारांची नावेही भाजप नजीकच्या काळात जाहीर करणार आहे. येत्या २७ फेब्रुवारीला राज्यसभेची निवडणूक व निकालही जाहीर होणार आहेत. त्यासाठी उमेदवारी अर्ज दाखल करण्याची अखेरची तारीख १५ फेब्रुवारी आहे. भाजपने उत्तर प्रदेश, बिहार, छत्तीसगड, हरयाणा, कर्नाटक, उत्तराखंड आणि पश्चिम बंगालमधील उमेदवार जाहीर केले. भाजपच्या यादीत जातीय समीकरणे निर्माण करण्याचा प्रयत्न स्पष्ट दिसत आहे. बिहारमधून धर्मशीला गुप्ता आणि डॉ. भीम सिंह यांना उमेदवारी देताना ज्येष्ठ नेते सुशीलकुमार मोदी यांना तिकीट मिळालेले नाही.
उत्तराखंडमधून महेंद्र भट्ट आणि पश्चिम बंगालमधून समिक भट्टाचार्य यांनाही उमेदवारी जाहीर करण्यात आली. छत्तीसगडमधून खासदार सरोज पांडे यांच्याऐवजी राजा देवेंद्र प्रताप सिंह तसेच सुभाष बराला यांना हरयाणातून, नारायण कृष्णसा भांडगे यांना कर्नाटकमधून, महेंद्र भट्ट यांना उत्तराखंडमधून व पश्चिम बंगालमधून समिक भट्टाचार्य यांना भाजपने संधी दिली आहे. उत्तर प्रदेशातील दहापैकी सात जागांवर भाजपने उमेदवार जाहीर केले. आर. पी. एन. सिंग, सुधांशू त्रिवेदी, तेजवीर सिंग, साधना सिंग, अमरपाल मौर्य, संगीता बलवंत आणि उत्तर प्रदेशमधील नवीन जैन यांच्या नावांचा समावेश आहे. यात या दोन महिलांचाही समावेश आहे.
