बॉलिवूडमध्ये ७० ते ८०च्य दशकात अनेक कलाकारांनी आपल्या सिनेमांनी इंडस्ट्री गाजवली. त्यापैकींच एक म्हणजे अभिनेत्री परवीन बाबी होत्या. त्या काळातील त्या सर्वात ग्लॅमरस अभिनेत्रींपैकी एक होत्या. त्यांनी जवळपास २० वर्ष आपल्या ग्लॅमरस अंदाजाने हिंदी सिनेसृष्टीवर राज्य केलं. त्यांचं स्टारडम इतकं होतं, की अनेक दिग्दर्शक-निर्मात्यांना त्यांच्यासोबत काम करायचं असायचं. आपल्या अदांनी एक काळ गाजवलेल्या अभिनेत्रीचा शेवट मात्र अत्यंत दुर्दैवी झाला होता. त्यांच्या शेवटच्या दिवसात संपूर्ण इंडस्ट्रीने त्यांना एकट्याला सोडलं होतं.
परवीन बाबी त्यांच्या शेवटच्या दिवसात अतिशय एकट्या होत्या. त्यांना मधुमेह झाला होता. त्याशिवाय पॅरानॉइड सिजोफ्रेनिया हा आजारही होता. या आजारात त्यांना कोणी मारुन टाकेल असंचं त्यांना वाटत होतं. त्यामुळे त्यांनी लोकांपासून स्वत:ला दूर केलं होतं. हळूहळू त्यांची परिस्थिती अत्यंत बिकट होऊ लागली आणि अचानक त्यांच्या निधनाची बातमी आली.
३ दिवस पडून होता मृतदेह
तीन दिवस परवीन बाबी आपल्या घराबाहेर आल्या नाहीत. त्यांच्या घराबाहेर दूध तसंच पेपर जमा झालेले होते. त्यामुळे त्यांच्या इमारतीच्या मॅनेजरला संशय आला आणि त्यांनी लगेच याबाबत पोलिसांना माहिती दिली. ज्यावेळी पोलिसांनी दरवाजा तोडला त्यावेळी आतील दृष्य पाहून सर्वांनाच मोठा धक्का बसला होता.
अंथरुणावर परवीन बाबी यांचा मृतदेह पडला होता. मृतदेह सडलेल्या अवस्थेत पडून होता. पोलिसांकडून लगेच त्यांचा मृतदेह शवविच्छेदनासाठी रुग्णालयात पाठवण्यात आला. शवविच्छेदन अहवालात अभिनेत्रीचा मृतदेह अन्न न खाल्ल्याने अर्थात भूकेने झाल्याचं सांगण्यात आलं होतं. २० जानेवारी २००५ रोजी वयाच्या केवळ ५०व्या वर्षी त्यांचं निधन झालं.
मुंबईतील जुहूतून एज रिवेरा इमारतीच्या ७व्या मजल्यावर त्या राहत होत्या. त्या २ ते ३ दिवस भुकेल्या असल्याचं अहवालातून समोर आलं होतं. मीडिया रिपोर्ट्सनुसार, परवीन बाबी यांचं निधन भूक आणि मधुमेहामुळे झाल्याचं सांगण्यात आलं होतं. त्याशिवाय त्यांच्या पोटात केवळ अल्कोहोल असल्याचंही काही रिपोर्ट्समध्ये सांगण्यात आलं होतं.
त्याशिवाय मधुमेहामुळे त्यांच्या एका पायाला गँगरीन झालं होतं. मृतदेहाशेजारी एक व्हिलचेअरदेखील होती. त्यांच्या खोलीत सगळं काही अस्तव्यस्त झालं होतं. कपडे, औषधं परसली होती. खोलीची अवस्था पाहून त्यांना चालत येत नसल्याचा अंदाज लावण्यात आला होता. झोपेतच त्यांचं निधन झालं होतं.
