अभिनेता रणवीर शौरीने मागितली जाहीर माफी, अयोध्येतील राम मंदिर उभारणीला केला होता विरोध
अयोध्येत उभारण्यात आलेल्या भव्य श्रीराम मंदिरात श्रीरामांची प्राण प्रतिष्ठा २२ रोजी आयोजित सोहळ्यात करण्यात येणार आहे. त्यापूर्वी लोकप्रिय बॉलिवूड अभिनेता रणवीर शौरीने यासंदर्भात माफी मागितली आहे. अभिनेत्याने अयोध्या आणि राम मंदिरासंदर्भात एक आश्चर्यकारक पोस्ट केली आहे. अभिनेत्याने राम मंदिर निर्माणासंदर्भात त्याची जी पूर्वी मतं होती त्याबाबत माफी मागितली. तो आधी या निर्माणाविरोधात होता आणि त्याचे मत असे होते की अयोध्येत मंदिराजागी एखादे रुग्णालय किंवा स्मारक उभारण्यात यावे. मात्र अभिनेत्याने आता एक्स प्लॅटफॉर्मवर ट्वीट करत जाहीर माफी मागितली.
२२ जानेवारी रोजी होणाऱ्या प्राण प्रतिष्ठा सोहळ्यापूर्वी १५ जानेवारी रोजी गाभाऱ्यात रामलल्लाच्या मूर्तीची स्थापना केली जाणार आहे. मिळालेल्या माहितीनुसार प्राण प्रतिष्ठा सोहळ्यासाठी ८ हजार लोकांना निमंत्रण पाठवण्यात आले आहे. फिल्म इंडस्ट्रीमधीलही दिग्गजांना या सोहळ्याचे निमंत्रण आहे. यामध्ये दाक्षिणात्य सिनेविश्वातून ७ तर बॉलिवूडमधील १२ कलाकारांना निमंत्रण पाठवण्यात आले आहे. राम मंदिराबाबत चर्चा होत असतानाच रणवीर शोरीने माफी मागणारे ट्वीट केले आहे.
काय म्हणाला रणवीर शौरी?
रणवीरने असे लिहिले आहे की, ‘मी अशा अनेक हिंदूंपैकी एक होतो जे अयोध्येतील मंदिराचा त्याग करण्यास इच्छुक होते आणि त्या जागी स्मारक किंवा रुग्णालय उभारावे, जेणेकरुन आपण समुदायांमध्ये हा दीर्घकाळ चाललेला संघर्ष संपवू शकू. आज मला लाज वाटते की मी शांततेच्या वेदीवर धार्मिकतेचा त्याग करण्यास तयार होतो. लाज वाटते की मी मर्यादा पुरुषोत्तम श्री राम आणि त्यांच्या मूल्यांसाठी उभा राहिलो नाही.’
अभिनेत्याने पुढे लिहिले की, ‘सत्य आणि न्यायासाठी ही प्रदीर्घ आणि कठोर लढाई लढणाऱ्या प्रत्येकाला माझ्याकडून मनःपूर्वक अभिनंदन. मी प्रभू श्रीरामांकडे क्षमा मागतो आणि भविष्यासाठी सतबुद्धीची प्रार्थना करतो. मी प्रार्थना करतो की आपल्या या महान भूमीत धर्म अनंतकाळ टिकून राहो आणि भारतातील सर्व लोकांसाठी शाश्वत शांती आणि समृद्धी घेऊन येवो. जय श्री राम.’
चाहते आणि सेलिब्रिटींच्या कमेंट
रणवीरच्या या पोस्टवर चाहते आणि सेलिब्रिटींकडून खूप कमेंट्स आल्या आहेत. कंगना रणौतने रणवीरची पोस्ट लाइक केली असून अनुपम खेर यांनीही ‘जय श्री राम’ लिहिले आहे. प्रभू श्रीरामाच्या सावलीत यायला अजून उशीर झालेला नाही असेही एका चाहत्याने लिहिले आहे. शिवाय अशी जाहीर माफी मागण्यासाठी धैर्य लागते, अशाही कमेंट आल्या आहेत.
