पंतप्रधान मोदींच्या दुसऱ्या टर्ममधील लोकसभेतील शेवटच्या भाषणात मोदींनी घराणेशाहीवरुन काँग्रेसला लक्ष्य केलं. अमित शहा, राजनाथ सिंहांची नावं घराणेशाहीशी जोडता येत नाहीत, असं मोदी म्हणाले.
राष्ट्रपती द्रौपदी मूर्मू यांच्या अभिभाषणावरील धन्यवाद प्रस्तावावर बोलताना पंतप्रधान नरेंद्र मोदींनी विरोधी पक्ष असलेल्या काँग्रेसवर जोरदार टीका केली. घराणेशाहीच्या मुद्द्यावरुन त्यांनी देशातील सर्वात जुन्या पक्षावर शरसंधान साधलं. एकाच कुटुंबातील दहा जण राजकारणात येणं यात गैर काहीच नाही. पण जो पक्ष कुटुंबातून चालवता जातो, ज्या पक्षाचे सगळे निर्णय कुटुंबाकडून घेतले जातात, ती घराणेशाही आहे, असं पंतप्रधान मोदी म्हणाले.
एकाच कुटुंबातील अनेकांनी राजकारणात येणं चुकीचं नाही. नवे चेहरे, तरुण चेहरे राजकारणात यायला हवेत अशी आमचीही भूमिका आहे. एखादं कुटुंब आपल्या क्षमतेच्या जोरावर, लोकांच्या पाठिंब्यावर राजकारणात प्रगती करत असेल तर त्याला आम्ही त्याला कधीच घराणेशाही म्हणत नाही. पण जो पक्ष एक कुटुंब चालवतो. त्या पक्षाचे सर्व निर्णयही एका कुटुंबाकडून चालवले जातात, त्याला आम्ही घराणेशाही म्हणतो, असं तर्कट मोदींनी मांडलं.
राजनाथ सिंह आणि अमित शहांचं नाव घराणेशाहीशी जोडता येऊ शकत नाही. राजनाथ सिंह यांना ना कोणताही राजकीय पक्ष, ना अमित शहांचा. एखाद्या कुटुंबातील दोन सदस्य प्रगती करत असतील तर मी त्यांचं स्वागत करेन. दहा जणांनीदेखील प्रगती केली तरी मी त्यांचं स्वागत करेन. नव्या पिढीचं स्वागत करणं योग्य आहे. पण काही कुटुंबच पक्ष चालवतात. त्या पक्षांचे अध्यक्ष एकाच कुटुंबातील असतात. वडील अध्यक्ष होतात. मग लेकाकडे अध्यक्षपद जातं. हा लोकशाहीसाठी धोकादायक आहे. घराणेशाही करणारे पक्ष राजकारणासाठी चिंतेचा विषय आहे, असं मोदी म्हणाले.
विरोधी पक्षांनी केलेल्या संकल्पाचं मला कौतुक आहे. विरोधकांनी प्रदिर्घ काळासाठी विरोधात बसायचा निश्चय केला आहे. कित्येक दशकं जे सत्तेत होते, त्यांनी आता अनेक दशकं विरोधात बसण्याची तयारी केली आहे. त्यांचा संकल्प देशातील जनता नक्की पूर्णत्वास नेईल, अशा शब्दांत मोदींनी काँग्रेसवर नाव न घेता टीका केली. घराणेशाहीमुळे देशाचं जितकं नुकसान झालं आहे, तितकंच नुकसान काँग्रेसचंही झालं आहे. कुटुंबाची सेवा तर करावी लागते. खरगे या सदनातून त्या सदनात गेले. गुलाम नबी आझाद यांनी तर पक्षच सोडला. घराणेशाहीमुळेच या सगळ्या गोष्टी घडतात. एकच प्रॉडक्ट वारंवार लॉन्च केल्यानं आता दुकानाला कुलूप लावण्याची वेळ आली आहे, अशा शब्दांत मोदींनी काँग्रेसला लक्ष्य केलं.
