बिहारच्या मुझफ्फरपूर जिल्ह्यात एका सहायक महिला अभियंत्याचा मृतदेह संशयास्पद स्थितीत सापडला आहे. महिमा कुमारी असं अभियंत्याचं नाव आहे. २९ वर्षांच्या महिमा जल संसाधन विभागात सहायक अभियंता पदावर कार्यरत होत्या. शनिवारी त्यांचा मृतदेह सापडला. महिमा कुमारी अतरदह मोहल्ल्यात एका घरात भाड्यानं वास्तव्यास होत्या. त्या मूळच्या लखीसरायच्या रहिवासी होत्या. महिमा अविवाहित होत्या.
२०२० पासून महिमा जल संसाधन विभागात काम करत होत्या. त्या एका घरात भाड्यानं राहत होत्या. त्यांच्या मानेवर आणि चेहऱ्यावर जखमांच्या खुणा आढळून आल्या आहेत. त्यांचा मृतदेह घराच्या बेडरुममध्ये सापडला. मृतदेहाची अवस्था पाहून महिमा यांच्या कुटुंबियांना हत्येचा संशय आला. महिमा यांचा मृतदेह सापडल्याची माहिती त्यांच्या शेजाऱ्यांनी पोलिसांना कळवली. त्यानंतर पोलिसांनी घटनास्थळी पोहोचून तपास सुरू केला.
विनोद गुप्ता नावाच्या व्यक्तीच्या घरात महिमा कुमारी एकट्याच दोन वर्षांपासून एकट्याच राहत होत्या. त्याआधी त्यांचे आई, वडिलही त्यांच्या सोबत राहायचे. महिमा यांच्या नाक आणि कानातून रक्तस्राव सुरू होता. त्यांचा मोबाईल बंद स्थितीत खोलीत सापडला. पोलिसांनी तो जप्त केला आहे.
रात्री उशिराच्या सुमारास फॉरेन्सिकचं पथक आणि श्वान पथक घटनास्थळी पोहोचलं. त्यांनी खोलीतून पुरावे गोळा केले. रक्ताचे नमुने आणि बोटांचे काही ठसे फॉरेन्सिकला सापडले. घरात चोरी किंवा लूटमार झाल्याचे पुरावे पोलिसांना सापडलेले नाहीत. महिमा यांचे नातेवाईक रात्री उशिरा तिच्या घरी पोहोचले. यानंतर पोलिसांनी महिमा यांचा मृतदेह शवविच्छेदनासाठी एसकेएमसीएचला पाठवला.
