छत्तीसगडच्या कवार्धा येथे आज, सोमवारी झालेल्या भीषण अपघातात 17 जणांचा मृत्यू झाला आहे. पिकअप व्हॅन खोल खड्ड्यात पडल्यामुळे हा अपघात झाला असून या वाहनात सुमारे 25 ते 26 लोक प्रवास करीत होते.
याबाबत कवार्धाचे पोलिस अधीक्षक अभिषेक पल्लव यांनी सांगितले की, कवर्धा परिसरात कामगारांना घेऊन जाणारे पिकअप वाहन एका खड्ड्यात उलटून हा अपघात झाला. सर्व मजूर आपले काम उरकून परतत असताना त्यांचे वाहन एका खोल खड्ड्यात पडले. घटनेची माहिती मिळताच पोलिसांनी प्रशासनाच्या मदतीने बचावकार्य राबवले. यात आतापर्यंत 17 जणांचा मृत्यू झालाय. तर 8 ते 10 जण जखमी आहेत.
जखमींना रुग्णालयात दाखल करण्यात आल्याचे पल्लव यांनी सांगितले. छत्तीसगडचे उपमुख्यमंत्री विजय शर्मा म्हणाले की, कवार्धा येथे मजुरांनी भरलेले पिकअप वाहन पलटी झाल्याने काहींचा मृत्यू झाल्याची बातमी अत्यंत वेदनादायी आहे. यामध्ये ज्यांनी आपले प्रियजन गमावले आहेत त्या सर्व कुटुंबांसोबत माझ्या संवेदना आहेत. यासोबतच सर्व जखमी लवकरात लवकर बरे व्हावेत अशी मी कामना करतो. राज्य सरकारच्या देखरेखीखाली स्थानिक प्रशासन पीडितांना आणि त्यांच्या कुटुंबीयांना शक्य ती सर्व मदत पुरवत असल्याचे शर्मा यांनी सांगितले.
