आगामी लोकसभा निवडणुकीत कमळाचे फूल हाच भाजपचा उमेदवार असणार आहे त्यामुळे पुढचे शंभर दिवस त्याच्या विजयासाठी शर्थीचे प्रयत्न करा असे आवाहन पंतप्रधान मोदी यांनी भाजप पदाधिकाऱ्यांना केले आहे.
‘आगामी लोकसभा निवडणुकीत पक्षाचे निवडणूक चिन्ह असलेले कमळाचे फूल हाच भाजपचा उमेदवार असणार आहे. पुढच्या १०० दिवसांत त्याच्या विजयासाठी शर्थीचे प्रयत्न करा’, असे आवाहन पंतप्रधान नरेंद्र मोदी यांनी शनिवारी देशभरातील पक्षनेत्यांना केले. ‘जम्मू-काश्मीरसाठी बलिदान देणारे डॉ. श्यामाप्रसाद मुखर्जी यांना भाजप ३७० जागांवर विजय मिळवून आदरांजली वाहणार आहे. भाजप आघाडीला निश्चितपणे ४००पेक्षा जास्त जागा मिळतील’, असा विश्वासही त्यांनी व्यक्त केला.
प्रगती मैदानावरील ‘भारत मंडपम’ येथे भाजपच्या दोन दिवसीय राष्ट्रीय कार्यकारिणी व राष्ट्रीय परिषदेला प्रारंभ झाला. उद्घाटनापूर्वी पंतप्रधान मोदी यांनी राष्ट्रीय पदाधिकाऱ्यांना संबोधित केले. ‘३७० हा भाजपसाठी केवळ आकडा असून, ते प्रगल्भ भावनेचे प्रतीक आहे. देशाची एकता व अखंडतेच्या हितार्थ कलम ३७० रद्द करण्यासाठी मुखर्जी यांनी बलिदान दिले. त्यांना खरी श्रद्धांजली म्हणून भाजपने ३७० जागांवर विजय मिळवावा’, असे आवाहन त्यांनी केले. ‘मागील निवडणुकीच्या तुलनेत आगामी लोकसभा निवडणुकीत प्रत्येक बूथवर ३७० अधिक मते मिळवण्याचे लक्ष्य ठेवा’, अशी सूचनाही मोदी यांनी पदाधिकाऱ्यांना केली.
भाजपचे राष्ट्रीय सरचिटणीस विनोद तावडे यांनी पदाधिकाऱ्यांच्या बैठकीबाबत पत्रकारांना अधिक माहिती दिली. ‘आरोपमुक्त आणि विकासयुक्त कारभार’ याद्वारे विरोधकांना उत्तर देण्याची रणनीती भाजपने आखली असल्याचे त्यांनी सांगितले. ‘सन २०१९च्या निवडणुकीत पराभव झालेल्या १६१ जागांवर भाजपने मागील पाच वर्षांत विशेष मेहनत घेतली आहे. या १६१ मतदासंघांमध्ये केंद्रीय मंत्र्यांनी ४३० वेळा भेट दिली. यापैकी बहुसंख्य जागा भाजप जिंकणार आहे’ असा विश्वास तावडे यांनी व्यक्त केला. ‘पंतप्रधान मोदी हे आधी १३ वर्षे मुख्यमंत्री आणि गेले दशकभर पंतप्रधान म्हणून २३ वर्षांपासून प्रशासनप्रमुख म्हणून काम करत आहेत. एवढ्या वर्षांमध्ये भ्रष्टाचाराचा एकही आरोप न झालेले ते देशातील पहिलेच नेते ठरले आहेत’, असे कौतुगोद्गारही त्यांनी काढले.
पंतप्रधानांच्या ठळक सूचना
– येत्या २५ फेब्रुवारीपासून लोकसभेच्या प्रचारमोहिमेला वेग द्या.
– मोदी सरकारच्या प्रत्येक लाभार्थ्यापर्यंत पोहोचा.
– महिला मतदारांचे आशीर्वाद घ्या.
– सोशल मीडियावर सक्रिय राहा.
– विरोधक ‘तू तू-मै मै’ किंवा अनावश्यक मुद्दे उपस्थित करतील. त्याकडे दुर्लक्ष करा.
– विकास, गरीब कल्याण योजना हाच भाजपच्या प्रचाराचा आधार ठेवा.
– प्रथमच मतदान करणाऱ्या युवा मतदारांना २०१४ पूर्वीची व नंतरची देशातील स्थिती समजावून सांगा.
– महिला बचतगट व एनजीओ यांच्याशी थेट संवाद साधा.
