नांदेड / माहूर – माहूरच्या बसस्थानकाजवळील एका हेअर कटिंग सलूनच्या दुकानासमोरील बाकड्यावर अज्ञातांची विसरलेली बॅग हेअर ड्रेसर प्रदीप शेरकुरवार यांना आज मंगळवार रोजी सकाळी १० वाजताच्या सुमारास दिसून येताच त्यांनी तातडीने माहूर पोलीस ठाण्याला माहिती देत जमा केली असता ह्या बॅगेचा शोध घेत आलेल्या नातेवाईक व्यक्तींना पोलिसांनी ती बॅग परत केली. या घटनेमुळे हेअर ड्रेसर प्रदीप शेरकुरवार यांच्या प्रामाणिकपणाचे व माहूर पोलीसांच्या कर्तव्यतत्परतेचे सर्वत्र कौतुक होत असून, बॅगेच्या मुळ मालकांनी त्यांचे आभार मानले आहेत.
गीताताई कैलास राठोड रा.टेंडोळी ता.आर्णी जिल्हा यवतमाळ ह्या आपले पतीराज कैलास लक्ष्मण राठोड यांच्यासह खाजगी प्रवासी ट्रॅव्हल्सने पूणे येथून माहूर तालुक्यातील वाई बाजार या आपल्या माहेरी जात होत्या. माहूर येथे ट्रॅव्हल्समधून उतरल्यावर सदरील दांपत्यापैकी गीताताई या
महिलेची बॅग ही प्रदीप हेअर सलूनच्या बाहेरच्या बाकड्यावर विसरली.
दरम्यान दुकानात मालक प्रदीप शेरकुरवार यांना सदरील बॅग निदर्शनास येताच त्यांनी पोलिस निरीक्षक गणेश कराड यांच्याशी संपर्क साधून याबाबत माहिती दिली.
पोलीस नायक प्रकाश गेडाम यांनी तात्काळ जाय मोक्याच्या ठिकाणी भेट दिली असता व पोना गेडाम यांचे सोबत जात प्रदीप शेरकुरवार यांनी ती बॅग पोलीस ठाण्यात जमा केली.
दरम्यान,वाई बाजार येथे माहेरी गेल्यावर गीताताई यांनी आपली बॅग हरवल्याचे अर्थात माहूर येथे सदरील दुकानाच्या बाकड्यावर विसरल्या चे लक्षात आले. त्यांचे नातेवाईक पतीराज कैलास राठोड व भाऊ मिथुन जाधव यांनी माहिती मिळाल्याप्रमाने माहूर पोलीस ठाणे गाठले व हरवलेल्या बॅगेसंदर्भात सविस्तर माहिती दिली, असता पोना प्रकाश गेडाम, हेअर ड्रेसर प्रदीप शेरकुरवार यांनी सदरील बॅग त्यांच्या सुपुर्द केली.
गत आठवड्यातच याच परिसरात भाविकाची ३ लाख ६० हजार रुपयांच्या मुद्देमालची हरवलेली बॅग येथील सायकल स्टोअर चे मालक यांनी मुद्देमालासह पोलीसांच्या व तेथून मुळ मालकास जशीच्या तशी परत केली होती, ही घटना ताजी असतानाच आजच्या या दुसऱ्या घटनेने माहूर शहरातील व्यापारी, व्यावसायिक हे किती प्रामाणिक आहेत याचे आणखी एक ज्वलंत उदाहरण पुढे आले असून,प्रवास करताना वा थांब्यावर उतरल्यावर प्रवाशांनी आपली व आपल्या सामानाची काळजी घ्यावी असे आवाहन पोलीस निरीक्षक गणेश कराड यांनी माहूर येथे देवदर्शनासाठी येणाऱ्या भाविकांना विनंतीवजा सूचना केली असून, माहूरकरांनी रोशन भाई व शेरकुरवार यांच्या प्रामाणिकपणाचा आदर्श डोळ्यासमोर ठेवून भाविकांना अशीच सहकार्याची भूमिका घेण्याचे आवाहन केले आहे.
