राज्य शासनाच्या शिष्टमंडळाने मनोजजरांगे यांची अंतरवाली सराटी येथे भेट घेत मराठा आरक्षणासाठी राज्य सरकारने केलेल्या कार्यवाहीची माहिती दिली. ग्रामविकास मंत्री गिरीश महाजन यांनी मराठाआरक्षण साठी शासन सकारात्मकअसून आंदोलनकर्त्यांनी शासनाला सहकार्य करावे, असे आवाहन केले. यावेळी मंत्री उदय सामंत, मंत्री संदिपान भुमरे आदी उपस्थित होते.
दरम्यान या शिष्टमंडळाने वडीगोद्री (ता. अंबड) येथे ओबीसी भटके विमुक्त आरक्षण बचावसाठी बसलेल्या उपोषणकर्त्यांची भेट घेतली. यावेळी मराठा आरक्षण देताना अन्य समाजाच्या आरक्षणाला धक्का लागणार नसल्याचे मंत्री गिरीष महाजन यांनी उपोषणकर्त्यांना सांगितले.
आंदोलकांनी सरकारच्या कामावर विश्वास ठेवावा. राज्यातील कायदा – सुव्यवस्था राखण्यासाठी सहकार्य करावे. कुठल्याही दोन समाजामध्ये तेढ निर्माण होऊ नये, याची काळजी घ्यावी. राज्यात शांतता, कायदा सुव्यवस्था, बंधुभाव कायम राहिला पाहिजे. कोणत्याही कारणाने समाजा-समाजात वितुष्टता येऊ नये, असे आवाहनही यावेळी मंत्री श्री. महाजन यांनी केले.
