सोलापूर – बाळे येथील एन. के. किड्स स्कूल तर्फे एकदिवसीय कृषी पर्यटन सहलीत विद्यार्थ्यांनी भरभरून आनंद लुटला. आ. सुभाष देशमुख यांनी राबवलेल्या कृषी पर्यटन उपक्रमाच्या पार्श्वभूमीवर विद्यार्थ्यांना शेती, मत्स्य व्यवसाय, फळे, फुले व आयुर्वेदिक वनस्पतींचे प्रत्यक्ष ज्ञान मिळावे या उद्देशाने ही सहल आयोजित करण्यात आली होती. ही सहल हैदराबाद रोडवरील कल्याण कृषी पर्यटन केंद्र, तांदूळवाडी येथे उत्साहात पार पडली.
सहलदरम्यान विद्यार्थ्यांनी विविध प्रकारची फळझाडे, फुलझाडे, औषधी वनस्पती, शेती पद्धती यांची जवळून पाहणी करून त्यांचे महत्त्व जाणून घेतले. कृषी पर्यटन केंद्राचे संचालक परमेश्वर शरणार्थी यांनी विद्यार्थ्यांना तसेच शिक्षकांना मत्स्य व्यवसाय, पर्ल व्यवसाय, त्यामध्ये वापरण्यात येणारी साधने व त्याची प्रक्रिया यांचीही सविस्तर माहिती दिली. यामुळे विद्यार्थ्यांना पुस्तकापुरते मर्यादित न राहता प्रत्यक्ष अनुभवातून कृषी क्षेत्राची ओळख होण्यास मोठी मदत झाली.
केंद्रातील मिनी वॉटर पार्क, रेन डान्स, सिसो, झोका, घसरगुंडी आदी खेळांवर विद्यार्थ्यांनी मनसोक्त आनंद घेतला. रेन डान्स आणि वॉटर पार्कमध्ये सर्व विद्यार्थी भिजून चिंब झाले आणि सहलीचा आनंद अधिक खुलला.
यावेळी मुख्याध्यापिका श्वेता कस्तुरे, मुख्य शिक्षिका दिपाली कुलकर्णी, अश्विनी शिंगण, पुनम कळसाईत, शितल सुतार, सेविका संगीता हेगडकर, सुरेखा शिंदे यांच्यासह विद्यार्थ्यांची मोठी उपस्थिती होती.
शिक्षकांनी विद्यार्थ्यांना प्रत्येक ठिकाणी मार्गदर्शन करून सहल अधिक ज्ञानसमृद्ध व मनोरंजक बनवली.
कृषी पर्यटन, ग्रामीण पर्यावरण, नैसर्गिक सौंदर्य आणि खेळ यांचा उत्तम संगम झाल्याने एन. के. किड्स स्कूलची ही सहल विद्यार्थ्यांसाठी अविस्मरणीय ठरली.
