महाराष्ट्र नवनिर्माण सेना स्वबळाची तयारी करत असल्याचं चित्र आहे. कारण मनसे अध्यक्ष राज ठाकरे यांनी थेट ‘दोनशे पार’चा नारा दिला आहे. आपण २०० ते २२५ जागांवर विधानसभा निवडणूक लढवण्याची तयारी करायची आहे, असं राज ठाकरेंनी मनसे पदाधिकाऱ्यांच्या बैठकीत सांगितलं. विधानसभेच्या तयारीला लागण्याच्या सूचनाही राज ठाकरेंनी पदाधिकाऱ्यांना दिल्या आहेत. मी कुणाच्याही दारात जागा मागायला जाणार नाही, असं म्हणत राज ठाकरेंनी स्वबळाचे संकेत दिले आहेत. तर उद्धव ठाकरेंविषयी जनतेच्या मनात राग आहे. त्यांना मराठी माणसांनी नव्हे, तर मुस्लिम समाजाने मत दिल्याचंही राज ठाकरे म्हणाले. मनसे अध्यक्ष राज ठाकरे विधानसभा निवडणुका स्वबळावर लढवण्याची चाचपणी करताना दिसत आहेत. विधानसभेच्या २०० ते २२५ जागांवर निवडणूक लढवण्याची तयारी करा, अशा सूचना राज ठाकरेंनी दिल्या आहेत.
राज ठाकरेंनी मनसेच्या नेत्यांना मतदारसंघांचं वाटप केलं आहे. वरळीत राज ठाकरेंच्या वाढदिवसाचे पोस्टर संदीप देशपांडे यांनी लावल्याने ते आदित्य ठाकरेंविरुद्ध या मतदारसंघातून उतरणार असल्याची चर्चा आहे. तर बाळा नांदगावकर शिवडीतून लढण्याची चिन्हं आहेत.
दरम्यान, लोकसभेला पंतप्रधान नरेंद्र मोदी यांना बिनशर्त पाठिंबा देणाऱ्या राज ठाकरेंनी विधानसभेला मात्र महायुतीपासून फारकत घेत स्वबळाची हाक का दिली, असा प्रश्न विचारला जात आहे. मनसे महायुतीत लढण्यास त्यांच्या वाट्याला जेमतेम ४० जागा येण्याची शक्यता आहे. कारण भाजपचे १०५ विद्यमान आमदार असून त्यांनी १५० हून अधिक जागा लढवण्याचा निर्धार केला आहे. घटकपक्ष शिवसेना आणि राष्ट्रवादी यांचेही प्रत्येकी ४०-४० आमदार आहेत. अशा परिस्थितीत एक आमदार असलेल्या मनसेच्या वाट्याला महायुतीत ४० हून अधिक जागा येण्याची शक्यता कमी आहे. त्यामुळे युतीत आपली बार्गेनिंग पॉवर वाढवण्यासाठी राज ठाकरेंनी स्वबळाची पुडी तर सोडली नाही ना, असाही सवाल उपस्थित होत आहे.
