गुजरातच्या जुनागडमध्ये प्रक्षोभक भाषण केल्याप्रकरणी मुस्लीम धर्मगुरू मुफ्ती सलमान अजहरीला रविवारी गुजरात पोलिसांनी घाटकोपरमधून अटक केली. अटकेनंतर घाटकोपरमध्ये काही काळ तणाव वाढल्याचे पहायला मिळाले. दरम्यान परिसरात पोलिसांची कुमक वाढवण्यात आली.
गुजरातमधील जुनागडमध्ये ३१ जानेवारी रोजी कथित द्वेषपूर्ण भाषण केल्याप्रकरणी मुफ्ती सलमान अझहरी पोलिसांच्या रडारवर होता. गुजरात पोलिसांकडून त्याचा शोध सुरू असताना घाटकोपरमध्ये असल्याची माहिती मिळाली. त्यानंतर गुजरात पोलिसांनी मुफ्ती सलमान अजहरीला ताब्यात घेत रविवारी रात्री उशिरा जुनागडला नेण्यात आल्याची माहिती समोर येत आहे. जुनागडला नेण्यापूर्वी मुफ्ती सलमान अझहरीला न्यायदंडाधिकाऱ्यांसमोर हजर करण्यात आले. तेव्हा अजहरीला दोन दिवसाची ट्रांझिट रिमांड देण्यात आली असल्याची माहिती वकील आरिफ सिद्धिकी यांनी दिली आहे, तसेच मुंबई पोलीस अजहरींना गुजरात सीमेपर्यंत सोडल्याची माहिती मिळत आहे.
जुनागडमध्ये मुफ्ती सलमान अजहरी यांनी भाषण देताना आक्षेपार्ह वक्तव्य केलं होतं. त्यांचं हे वक्तव्य सोशल मीडियावर चांगलंच व्हायरल होत आहे. त्यामुळे दोन समाजात तेढ निर्माण होण्याची शक्यता लक्षात घेऊन गुजरात एटीएसने त्यांच्यावर भडकाऊ भाषण सोशल मीडियात व्हायरल झाल्यानंतर अजहरी आणि स्थानिक आयोजकांविरोधात आयपीसी कलम 153 बी आणि 505 (2) अंतर्गत प्राथमिक गुन्हा दाखल करण्यात आला होता. या प्रकरणात पोलिसांनी मलिक आणि हबीब या आयोजकांना अटक केली आहे.
दरम्यान मुफ्ती सलमान अजहरीला अटक केल्यानंतर रविवारी रात्री घाटकोपर पोलीस ठाण्याबाहेर अजहरीच्या समर्थकांचा मोठा जमाव जमा झाला होता. जमावाकडून पोलीस ठाण्याबाहेर घोषणाबाजी सुरू होती. परिस्थिती नियंत्रणाबाहेर जात असल्याची स्थिती निर्माण झाल्यानंतर अजहरीने पोलीस ठाण्याच्या खिडकीतून सगळ्यांना शांत राहण्याचे आणि रस्ता मोकळा करण्याचं आवाहन केले. मात्र तरीही त्यांच्या समर्थकांनी मोठी गर्दी केली आणि घोषणाबाजी सुरूच ठेवली. घाटकोपरचा एलबीएस मार्ग हा अत्यंत महत्त्वाचा असून तो समर्थकांनी रोखून धरला होता. समर्थकांच्या मोठ्या जमावाने बराच वेळ रास्ता रोको केल्यानंतर पोलिसांनी कारवाई करत सौम्य लाठीचार्ज केला. मुंबई पोलिसांचे वरिष्ठ अधिकारी-कर्मचारी मोठ्या संख्येने तैनात करण्यात आले होते. त्यामुळे रात्री उशिरापर्यंत वातावरण शांत करण्यात मुंबई पोलिसांना यश आले. घाटकोपरमध्ये आता शांततापूर्ण वातावरण आहे. मुंबईकरांच्या सुरक्षेसाठी रस्त्यावर पोलीस तैनात आहेत. त्यामुळे कोणत्याही अफवांवर विश्वास ठेवू नका, असे आवाहन पोलिसांनी केले आहे.
कोण आहे मुफ्ती सलमान अजहरी?
मुफ्ती सलमान अजहरी हा मौलाना स्वत:ला इस्लामी रिसर्च स्कॉलर म्हणवतो. तो जामिया रियाजुल जन्नाह, अल-अमान एज्युकेशन ॲण्ड वेलफेयर ट्रस्ट आणि दारुल अमानचा संस्थापक आहे. त्याने काहिराच्या अल अजहर विद्यापीठातून शिक्षण घेतल्याची माहिती अन्य एका रिपोर्टमध्ये आहे. तो सामाजिक-धार्मिक प्रकरणांमध्ये सक्रिय असतो. त्याचा मुस्लिम चाहता वर्ग खूप मोठा आहे. त्याने अनेक तरुणांना उपदेश केले असून तर कित्येकदा भडकाऊ भाषणदेखील दिले आहे.
