सोलापूर – सोलापूर पेन्शनर्स असोसिएशनच्या कार्यालयात गुरूवारी एका उत्साही प्रकाशन सोहळ्यात ‘श्री ईश्वरस्वरूप सत्यदर्शनम’ आणि ‘श्री विठ्ठल प्रार्थना’ या दोन महत्त्वाच्या पुस्तकांचे प्रकाशन झाले. घालदेव जाधव यांनी संपादित केलेल्या ‘श्री ईश्वरस्वरूप सत्यदर्शनम’ या पुस्तकातून ईश्वराचे स्वरूप, त्याची कारणे आणि ‘ईश्वर आश्वासन’ या संकल्पना सामान्य लोकांना सहजपणे समजून घेता येणार आहेत.
या कार्यक्रमाला उपस्थित असलेले महाराष्ट्र साहित्य परिषदेचे अध्यक्ष पद्माकर कुलकर्णी यांनी आपल्या भाषणात या दोन्ही ग्रंथांचे महत्त्व अधोरेखित केले. “सामान्य वाचकांना क्लिष्ट वाटणाऱ्या अध्यात्मिक विषयांची माहिती या ग्रंथातून सोप्या भाषेत मिळाली आहे,” असे त्यांनी सांगितले. ‘श्री ईश्वरस्वरूप सत्यदर्शनम’ या ग्रंथातून ‘ईश्वर काय आहे? कोण? केव्हा? का येतो? कसा येतो?’ यासारख्या मूलभूत प्रश्नांची उत्तरे मिळतील, तसेच ‘ईश्वर आश्वासन काय आहे? कोठे देतात? कोणाला देतात? केव्हा देतात?’ या प्रश्नांचा उलगडा सामान्य वाचकांसाठी अत्यंत महत्त्वपूर्ण ठरेल, असे मत कुलकर्णी यांनी व्यक्त केले.
गीता ज्ञानेश्वरी मंदिर, लिमयेवाडी येथील अच्युत मोफरे महाराज यांनी प्रकाशित केलेल्या या पुस्तकांचा प्रकाशन सोहळा जिल्हा पेन्शनर्स असोसिएशनचे अध्यक्ष सदाशिव उंब्रजकर, महाराष्ट्र साहित्य परिषदेचे अध्यक्ष पद्माकर कुलकर्णी, जिल्हा कोषागार अधिकारी वैभव राऊत, अपर कोषागार अधिकारी रामकृष्ण डंके यांच्या हस्ते पार पडला.
यावेळी भालचंद्र धुमाळ, सुभाष रंगदाळ, अरुण डांगे, प्रा. विलास मोरे, श्याम कांबळे, गौरीशंकर कोनापुरे, विजय अभ्यंकर, इंडे प्रिंटर्सचे श्रीशैल इंडे यांच्यासह अनेक साहित्यप्रेमी आणि मान्यवर उपस्थित होते.
