आयपीएल २०२४ मधील १०वी लढत रॉयल चॅलेंजर्स बेंगळुरू विरुद्ध कोलकाता नाइट रायडर्स यांच्यात झाली. केकेआरने टॉस जिंकून प्रथम गोलंदाजी करण्याचा निर्णय घेतला. बेंगळुरू संघाने नियमीत अंतराने विकेट गमावल्या असल्या तरी एका बाजूने विराट कोहली अँकर टाकून उभा होता.
विराटने ३६ चेंडूत अर्धशतक पूर्ण केले. या हंगामातील हे त्याचे सलग दुसरे अर्धशतक ठरले. कर्णधार फाफ डुप्लेसिससह डावाची सुरुवात करणाऱ्या विराट कोहलीने पहिल्या चेंडूपासून केकेआरच्या गोलंदाजाचा समाचार घेण्यास सुरुवात केली. केकेआरचा आघाडीचा जलद गोलंदाज मिचेल स्टार्कविरुद्ध विराटने अशी फलंदाजी केली ज्याचा त्याने कधीच विचार केला नसेल. स्टार्कच्या पहिल्या ओव्हरच्या पहिल्या चेंडूवर विराटने चौकार मारला. त्यानंतर दुसऱ्या ओव्हरमध्ये विराटने षटकार आणि चौकार मारला. विराटची आक्रमक फलंदाजी पाहून कर्णधार श्रेयस अय्यरने स्टार्कची गोलंदाजी बंद केली.
आयपीएल २०२४च्या लिलावात केकेआरने मिचेल स्टार्कला २४.७५ कोटी रुपयांना खरेदी केले होते. आयपीएलच्या इतिहासात कोणत्याही खेळाडूला इतकी मोठी बोली लावली गेली नाही. ऑस्ट्रेलियाकडून शानदार कामगिरी करणारा स्टार्क कोलकाताकडून खेळताना लयमध्ये दिसत नाहीय. भारतीय खेळपट्टीवर त्याची धुलाई होत असल्याचे दिसतय.
कोलकाताची पहिली मॅच सनरायझर्स हैदराबादविरुद्ध झाली होती. या लढतीत मिचेल स्टार्कला ४ षटकात ५३ धावा कुटल्या होत्या. आज ही आरसीबीच्या फलंदाजांनी त्याच्या ४ षटकात ४७ धावा वसुल केल्या. या दोन्ही लढतीत त्याला एकही विकेट घेता आली नाही.
मॅचमध्ये आरसीबीने प्रथम फलंदाजी करत २० षटकात ६ बाद १८२ धावा केल्या. उत्तरादाखल केकेआरने विजयाचे लक्ष्य ३ विकेटच्या बदल्यात आणि १६.५ षटकात पार केले. केकेआरचा हा सलग दुसरा विजय आहे. या विजयासह ते गुणतक्त्यात दुसऱ्या स्थानावर पोहोचले आहेत. बेंगळुरूकडून विराट कोहीलने ५९ चेंडूत नाबाद ८३ धावा केल्या. गेल्या सामन्यात विराटने पंजाब किंग्जविरुद्ध अर्धशतक केले होते. तेव्हा त्याच्या टी-२० करिअरमधील १०० अर्धशतकं झाली होती. केकेआरकडून वेंकटेश अय्यरने ३० चेंडूत ५० धावांचे योगदान दिले.
