अहमदनगर, 29 जुलै (हिं.स.)। संगमनेर रोटरी क्लबने आपल्या सामाजिक कार्याच्या माध्यमातून समाजाच्या हृदय सिंहासनावर अधिराज्य गाजविले आहे.रोटरीचे प्रकल्प हे कायमस्वरुपीचे प्रकल्प असतात आणि ते समाजासाठी प्रेरणादायी असतात. रोटरी आय केअर हॉस्पिटलच्या माध्यमातून रोटरी क्लबने केलेले सामाजिक कार्य हे देवत्वाची प्रचिती देणारे आहे, असे प्रतिपादन आमदार बाळासाहेब थोरात यांनी केले. मालपाणी लॉन्स येथे झालेल्या पदग्रहण समारंभात ते प्रमुख अतिथी म्हणून बोलत होते.
रोटरी क्लब ऑफ संगमनेरचे मावळते अध्यक्ष आनंद हासे यांनी अध्यक्षपदाची सूत्रे साईनाथ साबळे यांच्याकडे तर मावळते सचिव मधुसूदन करवा यांनी सचिवपदाची सूत्रे विश्वनाथ मालाणी यांचेकडे सुपूर्त केली.प्रमुख अतिथी म्हणून माजी प्रांतपाल डॉ.दीपक पोफळे,सहाय्यक प्रांतपाल विनोद पाटणी,माजी नगराध्यक्षा दुर्गा तांबे,संगमनेर तालुका युवक काँग्रेस अध्यक्षा जयश्री थोरात आदि उपस्थित होते.
या प्रसंगी संगमनेर तालुक्यात प्रतिष्ठीत समजला जाणारा रोटरी सेवा गौरव पुरस्कार गेली ५० हून अधिक वर्षांपासून रुग्णांची सेवा करणारे डॉ. अशोक पोफळे यांना प्रदान करण्यात आला. माजी प्रांतपाल डॉ.दीपक पोफळे म्हणाले की,रोटरी क्लबचे कार्य दैवी आनंद देणारे आहे.आजही देशातील २७ टक्के नागरिक उपाशी झोपत आहेत त्यांच्या उन्नतीसाठी कार्य करावे.रोटरी क्लबच्या माध्यमातून सदस्यांनी बिगर, बेटर आणि बोल्डर असे कार्य करावे ते समाजासाठी हितावह आहे.आपण समाजासाठी दायित्व लागतो या भावनेतुन सर्व सभासदांनी काम करावे असे आवाहन त्यांनी केले.