तभा फ्लॅश न्यूज/ सोलापूर : स्वातंत्र्य दिनाच्या निमित्ताने राष्ट्रीय ध्वजाबद्दल आदरभाव निर्माण करण्यासाठी तसेच देशाभिमान जागृत करण्यासाठी “हर घर तिरंगा” अभियान अंतर्गत महापालिका प्राथमिक शिक्षण मंडळाच्या वतीने विविध उपक्रम राबविण्यात आले. सुमारे २९५ शाळांमधील अंदाजे ६० हजार विद्यार्थ्यांनी या उपक्रमात सहभाग नोंदवला.
तिरंगा प्रदर्शन, शाळा भिंती सजवणे व फलक सजवणे, रांगोळी स्पर्धा, तिरंगा राखी बनविणे आदी उपक्रमाद्वारे
बंधुत्व अन् देश प्रेमाचा संदेश देण्यात आला.
महापालिका आयुक्त डॉ. सचिन ओम्बासे यांच्या आदेशानुसार व उपायुक्त तैमूर मुलाणी यांच्या मार्गदर्शनाखाली मनपा प्राथमिक शिक्षण विभागाच्या संयोजनातून हे उपक्रम राबविण्यात आले. या माध्यमातून विद्यार्थ्यांमध्ये देशभक्तीची भावना, सर्जनशीलता आणि सामूहिक सहभागाची जाणीव दृढ झाली.
भारताच्या स्वातंत्र्याचा महोत्सव आणि राष्ट्रीय ध्वजाबद्दल आदरभाव निर्माण करण्यासाठी “हर घर तिरंगा” या मोहिमेच्या अनुषंगाने सोलापूर महानगरपालिका प्राथमिक शिक्षण मंडळाच्या कार्यक्षेत्रातील तसेच खाजगी प्राथमिक व माध्यमिक शाळांनी उत्साहपूर्ण सहभाग नोंदवला.या अभियानात एकूण २९५ शाळांचा सहभाग राहिला असून अंदाजे ५० ते ६० हजार विद्यार्थी या उपक्रमात सहभागी झाले. विविध उपक्रमांच्या माध्यमातून विद्यार्थ्यांनी देशभक्तीचा संदेश जनमानसात पोहोचवला.
विविध शाळांमध्ये हे उपक्रम राबविले
शाळा भिंती सजवणे व फलक सजवणे, शाळांच्या भिंती आणि माहितीफलक तिरंग्याच्या रंगांनी आणि प्रेरणादायी घोषवाक्यांनी सजविण्यात आले. तिरंगा प्रदर्शन – विद्यार्थ्यांनी तिरंगा विषयक चित्रे, हस्तकला व पोस्टरच्या माध्यमातून भव्य प्रदर्शन भरवले. रांगोळी स्पर्धा – राष्ट्रीय एकतेचे प्रतीक असलेल्या तिरंग्याच्या रंगांत विविध रांगोळ्या साकारल्या गेल्या. तिरंगा राखी बनविणे – रक्षाबंधनाच्या निमित्ताने विद्यार्थ्यांनी तिरंगा रंगातील राख्या तयार करून बंधुत्व आणि देशप्रेमाचा संदेश दिला.
