मोहोळ – भाजीपाला विक्रीसाठी घेऊन निघालेल्या शेतकऱ्याच्या ट्रॅक्टरला एसटी बस ने पाठीमागून धडक देऊन झालेल्या अपघातात ट्रॅक्टर चालक गंभीर जखमी तर अन्य दोघे किरकोळ जखमी झाले. हा अपघात रविवारी (ता २६ ) रोजी पहाटे चार वाजण्याच्या सुमारास मोहोळ- पंढरपूर- पालखी महामार्गा वर पोखरापूर शिवारातील एका वळणावर झाला. अजय राजू काकडे (रा खवणी) असे जखमीचे नाव असून, त्याला उपचारासाठी सोलापूर येथील रुग्णालयात दाखल केले आहे. अन्य दोघा जखमींची नावे समजू शकली नाहीत.
मोहोळ पोलिसां कडून मिळालेल्या माहिती नुसार, ट्रॅक्टर क्रमांक १३) ई एस ०१८९ हा कोबी व अन्य भाजीपाला घेऊन पहाटे चार वाजण्याच्या सुमारास मोहोळच्या दिशेने निघाला होता. त्याच वेळी रत्नागिरी आगाराची एसटी बस क्रमांक एम एच ८ / एपी ५७२४ ही मोहोळच्या दिशेने निघाली होती. दोन्ही वाहने पालखी महामार्गावरील पोखरापूर वळणावर येताच एसटी बस ने ट्रॅक्टरला पाठीमागुन जोराची धडक दिली. धडक इतकी जोरात होती की ट्रॅक्टर पलटी झाला, तर ट्रॉली एका बाजूला जाऊन पडली.अपघाता नंतर एसटी बस दुभाजकावर चढली.
या अपघाताची नोंद मोहोळ पोलिसात झाली असून, अधिक तपास अपघात पथकाचे हवालदार अतुल क्षीरसागर करीत आहेत.
एसटी बसने पाठीमागून धडक दिल्यानंतर ट्रॅक्टर पलटी झाला तर एसटी बस दुभाजकावर चढली.
