चंदीगड, ८ ऑगस्ट (हिं.स.) : काही कारणांमुळे कुस्तीपटू विनेश फोगाट ऑलिम्पिक अंतिम फेरी खेळू शकली नसली तरी ती आपल्या सर्वांसाठी चॅम्पियन आहे. आमच्या सरकारने ठरवले आहे की विनेश फोगाटचे पदक विजेत्याप्रमाणे स्वागत आणि सत्कार करण्यात येईल, असे हरियाणाचे मुख्यमंत्री नायब सैनी यांनी घोषित केले आहे. ऑलिम्पिक रौप्यपदक विजेत्याला हरियाणा सरकार जे सर्व सन्मान, बक्षिसे आणि सुविधा देते ते विनेश फोगाटला दिले जातील. आम्हाला तुझा अभिमान आहे विनेश!’, असेही सैनी यांनी म्हटले आहे.
मुख्यमंत्री नायब सैनी यांनी सोशल मीडियावर लिहिले की, ‘आमची हरियाणाची धाडसी मुलगी विनेश फोगाटने जबरदस्त कामगिरी करत ऑलिम्पिकमध्ये अंतिम फेरीत प्रवेश केला होता.
विनेश फोगाटची कामगिरी
विनेशने पॅरिस ऑलिम्पिकमध्ये चमकदार कामगिरी करत अंतिम फेरीत धडक मारली. तिने पहिल्या फेरीतच जपानी कुस्तीपटू युई सुसाकीचा पराभव करत इतिहास रचला. या सामन्यापूर्वी युईने तिच्या आंतरराष्ट्रीय कारकिर्दीतील सर्व ८२ सामने जिंकले होते. याआधी टोकियो ऑलिम्पिकमध्ये विरोधी कुस्तीपटू तिच्याविरुद्ध एकही गुण मिळवू शकला नाही. यानंतरही विनेशने तिच्याविरुद्ध ३-२ असा विजय मिळवला. यानंतर तिने युक्रेन आणि क्युबाच्या कुस्तीपटूंचा पराभव केला.
