अहमदनगर लोकसभा मतदारसंघात यावेळी मतदानाचा टक्का किचिंत वाढला आहे. शहरापेक्षा ग्रामीण भागात अधिक उत्साह असल्याचे पाहायला मिळाले. निवडणूक आयोगाने मतदान वाढविण्यासाठी राबविलेल्या विविध उपक्रमांसोबत ग्रामीण भागातील राजकीय चढाओढ, मधल्या काळात न झालेल्या स्थानिक स्वराज्य संस्थांच्या निवडणुका ही कारणेही मतदान वाढीमागे असल्याचे सांगण्यात येते. आता यावरून निकालाचे अंदाज बांधले जाऊ लागले आहे. महायुतीचे उमेदवार डॉ. सुजय विखे पाटील आणि महाविकास आघाडीचे उमेदवार नीलेश लंके यांच्यात चुरशीची लढत झाली आहे. त्यामुळे आता मतदानाच्या आकडेवारीवरून विजयाची गणिते मांडली जाऊ लागली आहेत. तर दुसरीकडे प्रशासनाकडून अनेकदा सुधारित आकडेवारी जाहीर केली जात असताना टक्केवारीत वाढ झाल्याचे दिसून येत असल्याने त्याचीही चर्चा सुरू झाली आहे.
गेल्यावेळी म्हणजे २०१९ ला अहमदनगर मतदारसंघात ६४.७९ टक्के मतदान झाले होते. यावेळी ते ६६.६१ टक्के मतदान झाले. गेल्यावेळी शिर्डीत ६४.५४ टक्के मतदान झाले होते. यावेळी ६३.०३ टक्के मतदान झाले आहे. यावर्षी नगर शहर विधानसभा मतदार संघात सर्वात कमी म्हणजे ६२.५० टक्के मतदान झाले. तर सर्वाधिक ७०.१३ टक्के मतदान पारनेरला झाले. शेवगावला ६३.०३ टक्के, राहुरीला ७० टक्के, श्रीगोंद्याला ६७.९० टक्के आणि कर्जत जामखेडला ६६.१९ टक्के मतदान झाले. या मतदार संघात १९ लाख ८१ हजार ८६६ एकूण मतदार होते. यापैकी १३ लाख, २० हजार, १६८ मतदारांनी मतदान केले आहे. ६९.८३ टक्के पुरुषांनी तर ६३.११ टक्के महिलांनी मतदानात भाग घेतला आहे. नगर शहरात मुस्लिम आणि अल्पसंख्याक भागात मोठ्या प्रमाणावर मतदान झाले आहे. यापूर्वी या भागात एवढ्या मोठ्या संख्येने मतदार बाहेर पडल्याचे पाहिले नसल्याचे लोक सांगतात.
आता यावरून विजयाची गणिते मांडली जाऊ लागली आहेत. एकूण मतदानासोबतच कोणत्या विधानसभा क्षेत्रात किती मतदान झाले, यावरून गणिते मांडली जात आहेत. गेल्यावेळी महायुतीचे उमेदवार खासदार डॉ. सुजय विखे पाटील यांना ७ लाख, ४ हजार ६६० मते मिळाली होती, तर राष्ट्रवादीचे उमेदवार संग्राम जगताप यांना ४ लाख, २३ हजार, १८६ मते मिळाली होती. विखे २ लाख, ८१ हजार ५२६ मतांनी विजयी झाले होते. त्यांना ५८.५४ टक्के मते मिळाली होती. त्यावेळी १२ लाख, ६ हजार मतदान झाले होते. २०१४ मध्ये भाजपचे उमेदवार दिलीप गांधी यांना ६ लाख, ५ हजार १८५ मते मिळाली होती, तर राष्ट्रवादीचे राजीव राजळे यांना ३ लाख, ९६ हजार मते मिळाली होती. गांधी यांना ५६ टक्के मिळाली होती.
अर्थात यावेळी राजकीय समीकरणे मोठ्या प्रमाणात बदलली आहे, एवढेच नव्हे तर उलटी पालटीही झाली आहेत. यावेळी विखे यांच्याविरोधात महाविकास आघाडीचे नीलेश लंके यांनी निवडणूक लढविली. ते लोकसभा निवडणुकीला प्रथमत: सामोरे जात आहेत. २०१९ मध्ये पारनेर विधानसभा मतदारसंघातून ते १ लाख ३९ हजार ९६३ म्हणजे ६१.७ टक्के मते घेऊन विजयी झाले होते.
शिर्डीतही गणित अवघड
यावेळी शिर्डीत तिरंगी लढत झाली. त्यामुळे तेथील निकाल मत विभाजनावर ठरण्याची चिन्हे आहेत. महायुतीचे सदाशिव लोखंडे आणि महाविकास आघाडीचे भाऊसाहेब वाकचौरे यांच्यासोबतच वंचित बहुजन आघाडीच्या उत्कर्षा रुपवते रिंगणात होत्या. त्यामुळे रुपवते यांना मिळणारी मते पक्षाच्या आधारे, जातीच्या आधारे की विरोधी दोघांवरील नाराजीच्या आधारे कशी आणि किती वळतात, त्यावर विजयाचे गणित अवलंबून आहे.
