मालदिव्सच्या तीन मंत्र्यांनी भारतावर टीका करताना मर्यादा ओलांडली. त्यामुळे दोन्ही देशातील संबंध ताणले गेले. आता मालदिव्सच्या पंतप्रधानांना राजधानीतच धक्का बसला आहे.
पंतप्रधान नरेंद्र मोदींच्या लक्षद्विप दौऱ्यावर मालदिव्सच्या मंत्र्यांनी आक्षेपार्ह शब्दांत टीका केली. भारतीय पंतप्रधान आणि भारतावर आक्षेपार्ह शब्दांत टीका करणाऱ्या मंत्र्यांना निलंबित करण्यात आलं. या सगळ्या प्रकरणामुळे द्विपक्षीय संबंध ताणले गेले आहेत. अनेक भारतीयांनी त्यांचे मालदिव्स दौरे रद्द केले. त्याचा आर्थिक फटका येत्या काही दिवसांत मालदिव्सला बसेल. दुसरीकडे राजकीय आघाडीवर मालदिव्समधील सत्ताधाऱ्यांना मोठा धक्का बसला आहे.
मालदिव्सचे अध्यक्ष मोहम्मद मुइझ्झू यांना राजधानी मालेमध्येच मोठी नामुष्की सहन करावी लागली आहे. भारताचं समर्थन करणाऱ्या मालदिवियन डेमोक्रॅटिक पक्षानं राजधानी मालेत झालेल्या महापौर पदाच्या निवडणुकीत मोठा विजय मिळवला आहे. ‘इंडिया आऊट’ असा नारा देऊन सत्ता असलेल्या मुइझ्झू यांच्यासाठी हा मोठा धक्का मानला जात आहे. विरोधी पक्ष असलेल्या एमडीपीचे उमेदवार एडम अजीम मालेचे नवे महापौर असतील. हे पद आतापर्यंत मुइझ्झू यांच्याकडे होतं. अध्यक्षपदाची निवडणूक लढवण्यासाठी मुइझ्झू यांनी महापौरपदाचा राजीनामा दिला होता.
मालेच्या महापौरपदाची निवडणूक नुकतीच पार पडली. बॅलेट पेपरवर ही निवडणूक झाली. एमडीपीचे नेते ऍडम अजीम यांनी ५३०३ मतांसह मोठी आघाडी मिळवली. तर मुइझ्झू यांच्या पीपल्स नॅशनल काँग्रेसच्या (पीएनसी) नेत्या ऐशथ अजीमा शकूर यांना केवळ ३३०१ मतं मिळाली. एमडीपीचं नेतृत्त्व माजी राष्ट्राध्यक्ष मोहम्मद सोलिह करतात. भारत समर्थक नेते अशी त्यांची ओळख आहे. महापौर पदाची निवडणूक जिंकल्यानं त्यांच्या पक्षाला संजीवनी मिळाली आहे.
मुइज्जू पाच दिवसांचा चीन दौरा करुन मायदेशी परतले. आमचा देश लहान आहे. पण म्हणून आम्हाला धमकावण्याचा परवाना कोणालाही नाही, असं विधान त्यांनी मायभूमीत पाऊल ठेवल्यानंतर केलं. पण यावेळी त्यांनी कोणत्याही देशाचं नाव घेतलं नाही. मुइझ्झू यांचं चीनप्रेम सर्वश्रृत आहे. त्यामुळे त्यांचा निशाणा भारताकडे असल्याचं बोललं जात आहे. ‘इंडिया आऊट’चा नारा देऊनच मुइझ्झू सत्तेत आले आहेत.
