औंढा नागनाथ इथे आठवं ज्योतिर्लिंग असून परिसरातील ४० किलोमीटरवर पुरातन मंदिरं आहेत. काही जैन धर्मीयांचीही मंदिरं आहेत.
खोदकाम करताना आढळली मूर्ती
औंढा नागनाथ शहरातील जुन्या जैन मंदिराचं नव्याने बांधकाम केलं जात असून २६ जानेवारीपासून पायाच्या खोदकामास सुरुवात करण्यात आली आहे. मंगळवारी सकाळी साडेआठच्या सुमारास मजुरांनी खोदकाम सुरू केलं असता एक मोठी शिळा आढळून आली.
भगवान कुंथूनाथांची प्रतिमा
सव्वापाच फूट उंचीची आणि दोन फूट रुंदीची दगडाची शिळा वर काढून त्यावरील माती बाजूला सारली असता २४ तीर्थकारांपैकी सतरावे तीर्थकर असलेले भगवान कुंथूनाथांची प्रतिमा असल्याचं लक्षात आलं.
मूर्तीची विधीवत स्थापना करणार
तसेच दुसऱ्या बाजूला दोन फुटांची पार्श्वनाथ भगवान यांचीही मूर्ती सापडली. भगवान कुंथूनाथ यांच्या मूर्तीची विधीवत स्थापना मंदिराचं बांधकाम पूर्ण झाल्यानंतर करण्यात येणार असल्याचं सांगण्यात आलं आहे.
आधीही आढळली होती भगवान विष्णू मूर्ती
औंढा येथील नागनाथ मंदिराच्या परिसरात १९७२ मध्ये दुष्काळ पडला होता. त्यावेळी तलावाचं खोदकाम करत असताना भगवान विष्णू यांची मूर्ती आढळली होती. या मूर्तीची नागनाथ मंदिरात स्थापना करण्यात आलेली आहे.
