महाराष्ट्राच्या राजकारणात गेल्या वर्षभरापासून धक्कादायक घडामोडींचं सत्र सुरु आहे. मुख्यमंत्री एकनाथ शिंदे यांनी आज पंतप्रधान नरेंद्र मोदी यांची सहकुटुंब भेट घेतली. एनडीएची बैठक झाल्यानंतर अवघ्या चार दिवसांमध्ये पुन्हा एकदा मुख्यमंत्री शिंदे पंतप्रधान नरेंद्र मोदींना भेटण्यासाठी रवाना झाले. २ जुलै रोजी अजित पवार आणि राष्ट्रवादीचे ८ नेते एकनाथ शिंदे यांच्या मंत्रिमंडळात सहभागी झाले. तेव्हापासून राजकीय घडामोडींना वेग आला आहे. त्या पार्श्वभूमीवर शिंदे यांची भेट महत्त्वाची ठरते.
शिंदे कुटुंबीयांची नरेंद्र मोदींशी सदिच्छा भेट
पंतप्रधान नरेंद्र मोदी यांनी एकनाथ शिंदे आणि त्यांच्या कुटुंबाच्या सदिच्छा भेटीसाठी बराच वेळ दिला. पंतप्रधान मोदी यांनी शिंदे कुटुंबाच्या भेटीत मुख्यमंत्र्यांचे वडील संभाजीराव शिंदे यांना जवळच्या खूर्चीवर बसण्याचा मान दिला. त्यांचं देखील पंतप्रधानांनी स्वागत केलं. शिंदे कुटुंबाच्या चार पिढ्यांनी पंतप्रधानांची भेट घेतली. एकनाथ शिंदे यांनी कुटुंबाची इच्छा होती भेटण्याची पंतप्रधांना भेटण्याची त्यामुळं सदिच्छा भेट घेतल्याचं सांगितलं. यावेळी पंतप्रधान मोदी श्रीकांत शिंदे यांच्या मुलाशी देखील संवाद साधताना दिसून आले. माझ्या वडिलांना पंतप्रधान मोदींना भेटण्याचा आनंद झाला.
नरेंद्र मोदींशी थेट संपर्क
एकनाथ शिंदे यांनी गुवाहाटीमध्ये समर्थक आमदारांना बोलताना आपल्याला महाशक्तीची साथ असल्याचं म्हटलं होतं. त्याचा प्रत्यय त्यांच्या मुख्यमंत्रीपदी झालेल्या निवडीतून दिसून आला होता. महाराष्ट्रातील सत्ताबदलात एकनाथ शिंदे यांचा थेट संपर्क नरेंद्र मोदी आणि अमित शाह यांच्यासोबत असल्याचं वारंवार स्पष्ट झालं आहे. एनडीएच्या बैठकीनंतर चार दिवसात एकनाथ शिंदे यांनी सहकुटुंब पंतप्रधान नरेंद्र मोदी यांची भेट घेतली. नरेंद्र मोदी यांनी देखील यावेळी त्यांना वेळ दिल्यानं पुन्हा एकदा एकनाथ शिंदे त्यांचं दिल्लीचं कनेक्शन भक्कम आहे दाखवण्यात यशस्वी ठरले.
भाजपचा सर्वात मोठा मित्र एकनाथ शिंदे यांची शिवसेना
महाराष्ट्राच्या राज्य सरकारमध्ये राष्ट्रवादी काँग्रेस सहभागी झाल्यानं महायुती सरकारला बळ मिळालेलं आहे. सरकारचं पाठबळ वाढलेलं आहे. देशातील २६ विरोधी पक्षांनी इंडिया नावाची आघाडी जाहीर केली आहे. विरोधी पक्ष एकवटत असल्याचं पाहून नरेंद्र मोदी आणि भाजपनं देखील एनडीएला मजबूत करण्याचं जाहीर करत जुन्या मित्रांना साद घालायला सुरुवात केली. सध्या भाजपनंतर एनडीएतील सर्वात मोठा पक्ष एकनाथ शिंदे यांचा आहे. एकनाथ शिंदे यांच्या सोबत लोकसभेचे १३ खासदार आहेत. त्यामुळं भाजपला एनडीए म्हणून पुढं जायचं असल्याचं एकनाथ शिंदे यांचा सन्मान कायम ठेवावा लागणार आहे.
मुख्यमंत्री बदलाच्या चर्चांच्या पार्श्वभूमीवर भेट,
अजित पवारासंह राष्ट्रवादीच्या नेत्यांच्या एका गटानं सरकारमध्ये सहभागी होण्याचा निर्णय घेत त्यांनी मंत्रिपदं स्वीकारली. काँग्रेस नेते पृथ्वीराज चव्हाण, खासदार संजय राऊत यांनी अजित पवार यांना भाजपकडून मुख्यमंत्री केलं जाऊ शकतं असे दावे करण्यात आले होते. दुसरीकडे विधानपरिषद आमदार अमोल मिटकरी यांनी देखील अजित पवार यांचा लवकरच महाराष्ट्राचे मुख्यमंत्री म्हणून शपथविधी होईल, असं ट्विट केलं. गेल्या महिनाभरापासून मुख्यमंत्री बदलाचा चर्चा सुरु असताना आजची एकनाथ शिंदे आणि नरेंद्र मोदी यांची भेट कौटुंबिक असली तरी राजकीयदृष्ट्या महत्त्वाची आहे.
लोकसभा निवडणुकीच्या दृष्टीनं भाजपकडून राजकीय डावपेच आखले जात असताना आणि एनडीएची नव्यानं बांधणी होत असताना १३ खासदारांचं आणि सेनेच्या ४० आमदारांचं पाठबळ असणाऱ्या एकनाथ शिंदे यांना भाजप दुखावण्याचं धाडस करण्याची शक्यता धुसर होते.
