२०२१ मध्ये शेअर बाजारात असे काही कंपन्यांचे शेअर्स आले ज्यांनी लिस्टिंगच्या दिवशीच गुंतवणूकदारांना जवळपास दुप्पट परतावा दिला. असाच एक आयपीओ (IPO) नायकाची मूळ कंपनी FSN ई-कॉमर्स व्हेंचर्सचा होता.
काही आयपीओ असे असतात की त्यांच्या लिस्टिंगनंतर गुंतवणुकदारांना मोठा नफा मिळातो. २०२१ मध्ये आलेला असाच एक आयपीओ म्हणजे नायकाची मूळ कंपनी FSN ई कॉमर्स वेन्चरचा आहे. या आयपीओची प्राईस बँड १,१२५ रुपये होती तर लिस्टिंगवेळी शेअर्सची किंमत २,००० रुपयांच्या पुढे गेली होती. मात्र, या शेअरवर काही काळ दबाव दिसत असून लिस्टिंगनंतर एका वर्षात शेअरची किंमत उच्चांकापासून ५०% हून अधिक घसरली. त्यानंतर कंपनीने नोव्हेंबर २०२२ मध्ये गुंतवणुकदारांना जोडून ठेवण्यासाठी १:५ च्या प्रमाणात शेअर्स स्प्लिट केले, तरीही शेअर्समध्ये घसरण सुरूच आहे. आता तर तज्ज्ञांनी देखील गुंतवणूकदारांना नायकाचे शेअर्स विकण्याचा सल्ला दिला आहे.
नायका लक्ष्य किंमत काय?
देशांतर्गत ब्रोकरेज एचडीएफसी सिक्युरिटीजने पोर्टफोलिओमधून एफएसएन ई-कॉमर्स व्हेंचर्सचे शेअर्स कमी करण्याचा सल्ला देत गुंतवणूकदारांना लक्ष्य किंमत रुपये १३० ठेवली आहे. सध्या या शेअरची किंमत BSE निर्देशांकावर १५३.१५ रुपये आहे. शेअरचा ५२ आठवड्यांचा नीचांक ११४.३० रुपये आहे, जो या वर्षी एप्रिल महिन्यात नोंदवला. तर, गेल्या वर्षी ऑक्टोबर महिन्यात शेअरची किंमत २३५.७७ रुपये होती जो या शेअरचा ५२ आठवड्यांचा उच्चांक आहे.
ब्रोकरेजचे मत
एचडीएफसी सिक्युरिटीजने आपल्या अहवालात म्हटले आहे की आम्ही अलीकडेच टीम नायकाशी बोललो. संभाषणानंतर, असे दिसते की नायकाचे ग्राहक जोडण्याचा वेग ट्रॅकवर आहे. मात्र, जाहिरातींच्या कमाईत घट झाली आहे. नायका फॅशनचे कर्ज वाढल्याने कामगिरीबाबत चिंता वाढल्या आहेत. FSN ई-कॉमर्स व्हेंचर्सची स्थापना २०१२ मध्ये झाली जी एक स्मॉल कॅप कंपनी असून सेवा क्षेत्रात कार्यरत आहे.
नायकाची पुढील वाटचाल
नुकतेच नायकाच्या सीईओ फाल्गुनी नायर यांनी वार्षिक सर्वसाधारण सभेला संबोधित करताना कंपनीची योजना मांडली होती. त्या म्हणाल्या की भारतात सौंदर्य, पर्सनल केअर उत्पादनांचा दरडोई वापर वाढण्याची क्षमता आहे. जी आधीच $८० प्रति व्यक्ती आहे. नायर यांच्या मते, फॅशनमध्ये भारताचा दरडोई वापर $५४ आहे आणि २०३० पर्यंत $१६० पर्यंत पोहोचण्याची अपेक्षा आहे.
