अपघातासाठी सातत्याने चर्चेत असलेल्या समृद्धी महामार्गावर मध्यरात्री पुन्हा भीषण अपघात झाला. समृद्धी महामार्गावर वैजापूर येथील जांबरगाव टोल नाक्याजवळ हा अपघात झाला. बुलढाण्याहून नाशिकला जाणाऱ्या खासगी टेम्पो ट्रॅव्हलरने रस्त्याच्याकडेला उभ्या असलेल्या ट्रकला धडक दिली. या अपघातात १२ जणांचा मृत्यू झाला तर २३ जण जखमी झाले आहेत. मृतांमध्ये लहान बालकांचाही समावेश आहे. जखमी प्रवाशांना छत्रपती संभाजीनगरच्या घाटी रुग्णालयात दाखल करण्यात आले आहे. या टेम्पो ट्रॅव्हरलमध्ये एकूण ३५ प्रवासी होते.
छत्रपती संभाजीनगरच्या समृद्धी महामार्गावरील जांबरगाव टोलनाक्याजवळ एका ट्रॅव्हल्स बस आणि ट्रकचा भीषण अपघात झाला. प्रवासी बुलढाण्यातील बाबा सैलानींच्या दर्शनाला गेले होते. तिथून घरी परतत असताना त्यांच्या गाडीला अपघात झाला.चालकाला झोप लागल्याने हा अपघात झाल्याचे सांगण्यात येत आहे.
अपघाताची माहिती मिळताच स्थानिक वैजापूरसह आजूबाजूच्या गावातील नागरीक मदतीसाठी घटनास्थळी धावून आले. सर्व जखमींना रुग्णवाहिकेतून शासकीय रुग्णालयात दाखल करण्यात आले. घटनास्थळी समृद्धी महामार्गावरील बचाव पथक, वैजापूर पोलीस देखील दाखल झाले होते.
