पंढरपूर – महसूल विभागाशी संबंधित नागरिकांची प्रलंबित कामे मार्गी लावण्यासाठी महसूल विभागाकडून छत्रपती शिवाजी महाराज महाराजस्व समाधान शिबिर अभियानाचे राबविण्यात येत आहे. या अभियानातंर्गत आज दिनांक १४ रोजी पंढरपूर तालुक्यातील पुळुज व भाळवणी या मंडळातून एक हजार ५०५ विविध सेवा व विविध दाखले देण्यात आले असल्याची माहित तहसीलदार सचिन लंगुटे यांनी दिली.
या अभियानातंर्गत पुळुज व भाळवणी येथील शिबिरात निकाली काढण्यात आलेले फेरफार २११, सातबारा मधील दुरुस्ती ४४, डिजिटल सातबारा २८८, ८ अ उतारे १९६, विविध दाखले ५६२, प्रमाणपत्रे ४१८, एक खिडकी व्यवस्थेअंतर्गत निकालात काढण्यात आलेले अर्ज १४, भूसंपादन प्रकरणी कमी-जास्त पत्रके तयार करून गाव दप्तर अद्यावत करण्यात आलेली प्रकरणे १०, सामाजिक योजना २३, शिधापत्रिका १३३, कृषी यांत्रिकीकरण, फलोत्पादन व कृषी सिंचन योजना ५४, आभा कार्ड एच.बी, तपासणी व औषधोपचार ७९, ई- मोजणी फेरफार नकाशा ३५,आदी सेवा व दाखले देण्यात आले.
यामध्ये पुळुज मंडळातून ७५० तर करकंब मंडळातून ७५५ असे एकूण एक हजार ५०५ विविध सुविधा एकाच छताखाली पुरवण्यात आल्याचे तहसीलदार सचिन लंगुटे यांनी सांगितले.
यावेळी प्रांताधिकारी सचिन इथापे, नायब तहसीलदार वैभव बुचके, दीपक शिंदे, दुय्यम निबंधक निराळी, निमसडे, मंडळ अधिकारी संतोष सुरवसे पुळुज, गणेश साठे भाळवणी आदीसह तलाठी, ग्रामस्थ उपस्थित होते.
———————
या ठिकाणी पुढील शिबिरांचे आयोजन
यानंतर शुक्रवार दि.१० एप्रिल रोजी खर्डी, पटवर्धन कुरोली, शुक्रवार दि. १७ एप्रिल रोजी भंडीशेगाव, रोपळे. शुक्रवार दि. ८ मे रोजी पंढरपूर तर शुक्रवार दि.१५ मे रोजी तुंगत चळे या मंडळात शिबिराचे आयोजन करण्यात येणार आहे. तरी पंढरपूर तालुक्यातील संबधीत मंडळातील जास्तीत जास्त नागरिकांनी या महाराजस्व समाधान शिबिर मोहिमेचा लाभ घ्यावा, असे आवाहन तहसीलदार लंगुटे यांनी केले आहे.
