सांगोला – तालुक्यात ७ जिल्हा परिषद व १४ पंचायत समिती जागेसाठी सार्वत्रिक निवडणूक होत असून रविवार दि.१ फेब्रुवारी रोजी पुण्यश्लोक राजमाता अहिल्यादेवी होळकर सभागृह येथे टपाली मतदान घेण्यात आले. स.१० ते रात्री ८ पर्यंत सदर टपाली मतदान सुरू होते. एकूण ५८५ टपाली मतदार असून त्यापैकी ४३७ मतदान झाले असून टपाली मतदान ७४ टक्के झाल्याची माहिती सहा.निवडणूक निर्णय अधिकारी बाळूताई भागवत यांनी दिली.
सदर मतदान करण्यासाठी ७ कंपार्टमेंट तयार करण्यात आले होते. निवडणूक कर्तव्यावर असणारे अधिकारी व कर्मचाऱ्यांनी सकाळपासून मतदान केंद्रावर रांगा लावून उस्फूर्तपणे मतदान केले. मतदान केंद्रावर कोणताही अनुचित प्रकार घडू नये म्हणून पोलीस बंदोबस्त ठेवण्यात आला होता. टपाली मतदान करण्यासाठी निवडणूक कर्तव्यावर असलेल्या कर्मचाऱ्यांना मतदान करण्याचे आवाहन निवडणूक निर्णय अधिकारी बी.आर.माळी व सहा.निवडणूक निर्णय अधिकारी बाळूताई भागवत यांनी केले होते. यावेळी टपाली मतदान केंद्राचे नोडल अधिकारी दिपाली जाधव, सहा.गटविकास अधिकारी वसंत फुले, गटशिक्षणाधिकारी सुयोग नवले व प्रत्येक कंपार्टमेंट मध्ये केंद्राध्यक्ष, सहा.मतदान अधिकारी, मतदान अधिकारी २ व ३ उपस्थित असल्याची माहिती मीडिया नोडल अधिकारी मिलिंद सावंत यांनी दिली.
