सरकारी क्षेत्रातून टाटा समूहाने खरेदी केलेल्या एअर इंडियाची वित्त धुरा आता रिअल इस्टेट तज्ज्ञांच्या हाती असेल. संजय शर्मा यांची एअर इंडिया लिमिटेडचे मुख्य वित्त अधिकारी (सीएफओ) म्हणून नियुक्ती करण्यात आली आहे. त्यांना टाटा समूहातील विविध प्रकल्पांचा दीर्घ अनुभव आहे.
एअर इंडिया खरेदी केल्यापासून टाटा समूहाने परिचालनासह विविध प्रकारचे बदल सुरू केले आहेत. या अंतर्गतच ‘सीएफओ’ म्हणून हवाईक्षेत्राशी संबंधित अधिकाऱ्याची नियुक्ती न करता रिअल इस्टेटमधील वित्त व पतपुरवठा व्यवस्थापानचा अनुभव असलेल्या तज्ज्ञांची नियुक्ती करण्यात आली आहे. आगामी काळात एअर इंडियाला ताफा सक्षमीकरणासाठी एअरबस कंपनीच्या ‘ए३५०’ सह ‘बोइंग ७७७’ या अत्याधुनिक विमानांची खरेदी करायची आहे. त्यादृष्टीने संजय शर्मा यांचा वित्त व्यवस्थापनाचा अनुभव कंपनीच्या कामी येणार आहे.
एअर इंडियाने दिलेल्या माहितीनुसार, संजय शर्मा यांना व्यावसायिक वित्त व पतपुरवठा, गुंतवणूक, बँकिंग व रिअल इस्टेट क्षेत्राचा तीन दशकांचा अनुभव आहे. एअर इंडियातील नियुक्तीआधी ते टाटा प्रोजेक्ट्स लिमिटेडचे सीएफओ होते. त्याआधी टाटा रिअॅलिट इन्फ्रास्ट्रक्चर लिमिटेडचे व्यवस्थापकीय संचालक म्हणूनदेखील त्यांनी कार्यभार सांभाळला आहे. त्याआधी डॉइश बँक, डीएसपी मेरिल लिन्च आशिया पॅसिफिक अशा वित्तक्षेत्रांचाही त्यांना प्रदीर्घ अनुभव आहे. विनोद हेगमाडी यांच्या निवृत्तीनंतर ही नियुक्ती करण्यात आली आहे.
