सर्वच नेतेमंडळींचे कल्याण-डोंबिवलीत आणि कल्याण लोकसभेचे दौरे करत असल्याचं पाहता मतदारसंघाचे महत्त्व वाढल्याचं दिसत आहे.
कल्याण लोकसभेवर एकनाथ शिंदे यांची शिवसेना, भाजप, मनसे आणि उद्धव ठाकरे गटाने लक्ष केंद्रित केल्याचे चित्र आहे. उद्धव ठाकरे आणि आदित्य ठाकरे यांच्या कल्याण लोकसभा दौऱ्यानंतर 23 व 24 तारखेला राज ठाकरे कल्याण लोकसभेच्या दौऱ्यावर येणार आहेत. तर 24 तारखेला मलंगगड यात्रा असल्याने दोन्ही गटातील नेते मंडळी, खासदार आणि मुख्यमंत्री स्वतः मलंगगड सर करणार आहेत. भाजप आमदार किसन कथोरे यांचा मलंगगडच्या फर्निकल्युलरचा आज पाहणी दौरा आहे. तर 25 तारखेला श्रीनिवास कल्याणम कार्यक्रमासाठी मुख्यमंत्री आणि उपमुख्यमंत्री राहणार उपस्थित राहणार आहेत.
सर्वच नेतेमंडळींचे कल्याण-डोंबिवलीत आणि कल्याण लोकसभेचे दौरे पाहता मतदारसंघाचे महत्त्व वाढल्याचं दिसत आहे. जसजशी निवडणूक येईल, तसतसे कल्याण लोकसभेत राजकीय वातावरण तापत आहे. विशेष म्हणजे कल्याण लोकसभा हा शिवसेना भाजपचा बालेकिल्ला मानला जातो. मात्र मनसे अध्यक्ष राज ठाकरेंना मानणारा वर्ग या लोकसभेत मोठ्या प्रमाणात आहे.
तसेच मनसेचे एकमेव आमदार राजू पाटील सुद्धा याच लोकसभेत राहतात. कल्याण ग्रामीण विधानसभेचे ते आमदार आहेत. कॅबिनेट मंत्री रविंद्र चव्हाण हे डोंबिवलीचे आमदार असून त्यांची तिसरी टर्म आहे. तर आमदार गणपत गायकवाड यांची सुद्धा तिसरी टर्म असून ते कल्याण पूर्वचे आमदार आहेत. शरद पवार गटातील फायरब्रॅंड नेते जितेंद्र आव्हाड हे सुद्धा याच लोकसभा मतदारसंघात कळवा मुंब्रा विधानसभेतून निवडून येतात.
आपण जर पाहिले तर गेल्या वर्षभरात कल्याण लोकसभेत शिंदेंची सेना विरुद्ध भाजप राजकारण फारच तापले होते. त्यातच गोळीबारानंतर शिंदे यांची शिवसेनेचे आणि भाजप कार्यकर्त्यांमध्ये फारसे पटत नसल्याचे दिसून आले आहे. मनसे आमदार राजू पाटील यांची क्रेझ कल्याण लोकसभेत असल्याने आणि स्थानिक पातळीवर मनसेने उचलून धरलेले विषय पाहता मनसे विरोधकांची स्पेस घेऊ पाहत आहे. त्यामुळे येत्या काळात कल्याण लोकसभेवर कोणता झेंडा फडकेल, हे लवकरच आपल्याला समजणार आहे.
