तभा वृत्तसेवा,
पंढरपूर – येथील सांस्कृतिक आणि सामाजिक क्षेत्रात लोकोपयोगी समाजसेवा करणाऱ्या “भारत विकास परिषद शाखा पंढरपूर” यांच्या वतीने रविवारी (दि.२२ मार्च ) गायत्री सुपर स्पेशालिटी हॉस्पिटल येथे २०४ दिव्यांगांना मॉड्युलर हात आणि पाय मोफत बसवून देण्यात आले.
या मोफत दिव्यांग शिबिरात राज्यभरातून दिव्यांग बांधव सहभागी झाले होते.वसमत, जालना, धुळे, जळगाव, लातूर, इचलकरंजी, सोलापूर जिल्ह्यातील लोक या शिबिरात आले होते.या शिबिरात सर्व दिव्यांग व त्यांच्या सोबतच्या सहकाऱ्याची भोजनाची सोय करण्यात आली होती.
याआधी दि.१४ फेब्रुवारी रोजी या दिव्यांग लाभार्थी रुग्णांच्या हात-पायाची मापे घेण्यात आली होती. सुमारे पन्नास हजार रुपये किंमतीचे हात पाय असून आधुनिक पद्धतीने बनविण्यात येतात आता या लोकांना इतर सर्वसामान्य लोकांप्रमाणे हात, पाय वाकविता येतील.
या दिव्यांग शिबिराचे आयोजन पुणे येथील गेल महाराष्ट्र नॅचरल गॅस एजन्सी, पुणे दिव्यांग केंद्र, भारत विकास परिषद यांच्या वतीने करण्यात आले होते. भारत विकास परिषद शाखा पंढरपूरचे संस्थापक अध्यक्ष डॉ. सुरेन्द्र काणे, अध्यक्षा सौ.स्मिता कोर्टीकर, सचिव मंदार केसकर, कोषाध्यक्ष सुनील परळीकर, दिव्यांग केंद्र पुणे चे विनय खटावकर, डॉ.वर्षा काणे, पुणे येथुन राजशेखर अभ्यंकर, सुधीर कुलकर्णी आदी मान्यवर उपस्थित होते.
याप्रसंगी शिबिरास सहकार्य करणाऱ्या कर्मयोगी नर्सिंग कॉलेजचे विद्यार्थी व पुणे येथील स्वयंसेवकांचा जाहीर सत्कार करण्यात आला. भारत विकास परिषद शाखा पंढरपूरच्या सर्व पदाधिकाऱ्यांनी तसेच काणे हॉस्पिटल स्टाफ, सर्व सदस्यांनी शिबिर यशस्वी करण्यासाठी विशेष प्रयत्न केले.
——————-
जान्हवीचे डोळे पाणावले
या शिबिरात पंढरपूर तालुक्यातील वाखरी येथील केवळ दहा वर्षांची शेतकरी कुटुंबातील चिमुरडी जान्हवी रघुनाथ येळे या मुलीचा हात ती केवळ तीन वर्षांची असताना कडबा कुट्टी मशीन मध्ये गेला आणि तिने हाताचा पंजा गमावला, कोर्टि येथील भारत विकास परिषद सदस्य प्राथमिक शिक्षक मनोज कुलकर्णी यांनी या मुलीच्या पालकांना या दिव्यांग शिबिराची माहिती दिली होती, या मुलीला तिचा हात या शिबिरात परत मिळाला. जान्हवी हिने डोळ्यात आनंदाश्रू आणून भारत विकास परिषद शाखा पंढरपूरचे आभार मानले. अशी अनेक मन हेलावणारी उदाहरणे याशिबिरात पहायला-अनुभवायला मिळाली.
————————-
दिव्यांग बांधवाच्या हस्ते उद्घाटन
या मोफत दिव्यांग शिबिरासाठी वसमत येथील एक दिव्यांग व्यक्ती पहाटे तीन वाजता आले होते, याच दिव्यांग बांधवांच्या हस्ते शिबिराचे उद्घाटन करण्यात आले.
————————-
जिद्द कधी दिव्यांग नसते
“भारत विकास परिषदेच्या” वतीने आयोजित केलेले “मोजमाप व वाटप” शिबिरातून आम्ही दिव्यांगांना “हात-पाय” नव्हे तर एक आत्मविश्वास देऊ शकलो ही भावना सर्व सदस्यांच्या मनात उत्पन्न झाली. शिबिरातून परत जाणाऱ्या अनेक दिव्यांगांच्या मनात “मर्यादा शरीरात असतात पण जिद्द कधी दिव्यांग नसते” ही भावना दिसून आली.
