कुर्डूवाडी – निमगाव (टें) ता.माढा येथील प्रदीपकुमार भागवत पाटील यांच्या फार्मवर तयार झालेल्या ए.बी.एस.आरमाडा या उच्च प्रतीच्या जातीच्या पाडीला तब्बल ₹2,55,000 अशी विक्रमी किंमत मिळाली आहे. माढा तालुक्यात या जातीची एकही गाय कोणत्याही फार्मवर नसल्याने या पाडीला पाहण्यासाठी हौसी वर्गातुन गर्दी होत आहे.
उत्कृष्ट संगोपन, उत्तम पोषण आणि शास्त्रीय पद्धतीने तिसऱ्या जनरेशनमध्ये तयार करण्यात आलेली ही पाडी पूर्ण साईजमध्ये विकसित झाली असून ती दररोज ३५ लिटरपर्यंत उच्च दर्जाचे दूध उत्पादन देण्यास सक्षम आहे. पाडीचा दर्जा, आरोग्य आणि उत्पादनक्षमता पाहता खरेदीदारांकडून मोठी मागणी होती.
या यशामागे माजी आमदार बबनदादा शिंदे, माजी आमदार संजयमामा शिंदे, जिल्हा दूध संघाचे चेअरमन रणजीतसिंह शिंदे, आदर्श सरपंच यशवंत शिंदे, सुनील खापरे, तसेच कुर्डू गावचे नामांकित गाई व्यापारी व वस्ताद अण्णासाहेब ढाणे यांचे मार्गदर्शन लाभले असल्याची माहिती देण्यात आली.
या विक्रीमुळे परिसरातील पशुपालकांमध्ये उत्साहाचे वातावरण निर्माण झाले असून उच्च उत्पादकतेच्या दुभत्या जनावरांच्या संगोपनासाठी ही प्रेरणादायी घटना ठरली आहे.
ब्रीडवर सातत्याने काम करणे ही काळाची गरज आहे.
उत्कृष्ट व्यवस्थापन व योग्य पोषणामुळे कमी खर्चात अधिक उत्पादन घेता येते. जनावरांचे आरोग्य, जनरेशन सुधारणा आणि योग्य निवड यामुळे ब्रीडची किंमत आपोआप वाढते. अशा यशस्वी उदाहरणांमुळे ग्रामीण भागातील युवकांना प्रेरणा मिळते. या कामात वस्ताद आण्णासाहेब ढाणे यांचे मोलाचे मार्गदर्शन लाभले.
उच्च उत्पादकतेकडे लक्ष दिल्यास पशुपालन क्षेत्र आर्थिकदृष्ट्या अधिक मजबूत होऊ शकते.
प्रदिपकुमार पाटील, तरूण उद्योजक. पशुपालक.
