माळशिरस : पंचायत समितीच्या सभापतीपदी शिवसेना शिंदे गटाचे दत्तात्रय मगर तर उपसभापतीपदी राष्ट्रवादीच्या मनीषा पाटील यांची मतदानाद्वारे निवड करण्यात आली.
माळशिरस पंचायत समितीच्या सभापती व उपसभापती निवडीसाठी आज निवडणूक निर्णय अधिकारी तथा प्रांताधिकारी विजया पांगारकर यांच्या अध्यक्षतेखाली पंचायत समितीच्या सभागृहात बैठक बोलविण्यात आली होती. या निवडीसाठी सचिव म्हणून गटविकास अधिकारी रघुनाथ पांढरे यांनी काम पहिले. सकाळी अकरा वाजता सभापती पदासाठी राष्ट्रवादी शरद पवार गटाच्या वैष्णवीदेवी मोहिते पाटील, शिवसेना शिंदे गटाचे दत्तात्रय मगर व भाजपच्या ऋतुजा पराडे पाटील यांनी तर उपसभापती साठी राष्ट्रवादी शरद पवार गटाच्या वतीने मनीषा पाटील तर भाजपच्या वतीने आनंद शेंडगे यांनी आपले उमेदवारी अर्ज दाखल केले होते. त्यानंतर वैष्णवीदेवी मोहिते पाटील यांनी आपला उमेदवारी अर्ज मागे घेतला. दुपारी दोन वाजता सर्व नवीन सदस्यांची सभापती उपसभापती निवडी साठी बैठक घेण्यात आली. सभापती पदासाठी दोन व उपसभापती पदासाठी दोन अर्ज आल्याने हात उंच करून मतदान घेण्यात आले. सभापती पदासाठी दत्तात्रय मगर यांना बारा सदस्यांनी पसंती दिली तर ऋतुजा पराडे पाटील यांना सहा सदस्यांनी पसंती दिली. शिवसेना शिंदे गटाचे दत्तात्रय मगर यांना बारा सदस्यांनी पसंती दिल्याने त्यांची सभापती पदी निवड झाल्याचे निवडणूक निर्णय अधिकारी यांनी जाहीर केले उपसभापती पदासाठी दोन अर्ज असल्याने त्यासाठी हात उंच करून मतदान घेण्यात आले यामध्ये राष्ट्रवादी शरद पवार गटाच्या मनीषा पाटील यांना बारा सदस्यांनी पसंती दर्शवली तर भाजपाचे आनंद शेंडगे यांना सहा सदस्यांनी पसंती दर्शवली त्यामुळे निवडणूक निर्णय अधिकारी विजया पांगारकर यांनी उपसभापतीपदी मनीषा पाटील यांची निवड जाहीर केली.
यांनी केले मगर व पाटील यांना मतदान
सभापती दत्तात्रय मगर व उपसभापती मनीषा पाटील यांना वैष्णवी देवी मोहिते पाटील, विमल जानकर, निशा गिरमे, युवराज झंजे, रेश्मा माने, सोनाली पाटील, अड प्रवीण वाघमोडे, मनीषा नाईकनवरे, आप्पासाहेब पाटील, महादेव साबळे
यांनी केले पराडे पाटील व शेंडगे यांना मतदान
ऋतुजा पराडे पाटील व आनंद शेंडगे यांना दत्तात्रय शेळके, तनुजा खिलारे, राजश्री रुपनवर, नम्रता पुकळे यांनी मतदान केले
मोहिते पाटील व आ जानकर गटाने पंचायत समितीची निवडणूक राष्ट्रवादी शरद पवार राष्ट्रवादी अजित पवार व शिवसेना शिंदे गट यांनी एकत्रित निवडणूक लढवली होती. यामध्ये राष्ट्रवादी शरद पवार गटाचे आठ सदस्य राष्ट्रवादी अजित पवार गटाचे दोन व शिवसेना शिंदे गटाचे दोन असे बारा सदस्य निवडून आले होते तर भाजपचे सहा सदस्य निवडून आले होते
निवडीनंतर नवीन सभापती व उपसभापती यांचा खासदार धैर्यशील मोहिते पाटील आमदार उत्तमराव जानकर यांनी सत्कार केला यावेळी अर्जुन सिंह मोहिते पाटील ,विष्णू नारनवर, मिलिंद सरतापे, प्रताप पाटील, मच्छिंद्र ठवरे, जीवन जानकर, माऊली पाटील, तुकाराम देशमुख यासह मोहिते पाटील व जानकर गटाचे कार्यकर्ते उपस्थित होते.निवडी नंतर कार्यकर्त्यांनी गुलालाची मुक्त उधळण करीत जल्लोष केला .
सोलापूर जिल्ह्यात पहिल्यांदाच माळशिरस पंचायत समितीच्या सभापतीपदी शिवसेना शिंदे गटाचे दत्तात्रय मगर यांची निवड झाल्याने प्रथमच शिंदे सेनेचा सभापती झाला आहे.
