अणदूर – धाराशिव जिल्हा परिषद निवडणूक, अणदूर गटातून शिवसेना उध्दव बाळासाहेब ठाकरे गटाकडून, ग्रामपंचायत सदस्य तथा धाराशिव जिल्हा उपप्रमुख शिवसेना डॉ जितेंद्र कानडे यांनी आज आपला उमेदवारी अर्ज दाखल केला, महाविकास आघाडीकडून त्यांनी अणदूर जिल्हा परिषद गटासाठी हा उमेदवारी अर्ज दाखल केला असून, या गटातून आता हाय हॉल्टेज लढत पहावयास मिळणार आहे.
डॉ जितेंद्र कानडे हे गेली 4 टर्म ग्रामपंचायत सदस्य आहेत, तसेच त्यांनी शिवसेना उध्दव बाळासाहेब ठाकरे यांच्या पक्षाकडून उमेदवारी अर्ज दाखल केला आहे, धाराशिव जिल्ह्याचे खासदार ओम राजे निंबाळकर व आमदार कैलास पाटील यांचे ते निकटचे सहकारी आहेत. तसेच शैक्षणिक, सामाजिक क्षेत्रात त्यांचे कार्य फार मोठे असून, त्यांच्या उमेदवारी अर्ज दाखल करण्यामुळे या मतदार संघात चुरशीची लढत पहावयास मिळणार आहे.
अणदूर जिल्हा परिषद व त्या खालील अणदूर, चिवरी पंचायत समिती मध्ये सर्वसाधारण पुरुष उमेदवार असे आरक्षण असून त्या मुळे या जागेसाठी हाय हॉल्टेज लढत पहावयास मिळणार आहे, भारतीय जनता पक्षाकडून ॲड. दीपक आलूरे यांची उमेदवारी निश्चित मानली जात असून भारतीय जनता पक्षाच्या वतीने अणदूर पंचायत समिती गणासाठी माजी मंत्री मधुकरराव चव्हाण यांचे नातू, व भाजपा युवा नेते सुनील चव्हाण यांचे चिरंजीव रणवीर चव्हाण हे निवडणूक लढवणार असल्याचे खात्रीलायक वृत्त असून, त्यांच्या विरोधात महाविकास आघाडीकडून अद्याप उमेदवारी कोणाला मिळणार हे स्पष्ट झाले नाही, एकंदरीत ही निवडणूक, दिग्गज उमेदवारांमुळे अटीतटीची व प्रतिष्ठेची होणार असल्यामुळे संपूर्ण जिल्ह्याचे लक्ष लागले आहे.
