माहूर – दैनंदिन सतत वाहनांची रेलचेल व नागरीकांची येजा असलेल्या माहूर शहरातील वार्ड क्र. ०१ ,कपिलनगर येथील राष्ट्रीय महामार्ग ते बाबा सोनापिर दर्गा रोडवर सुसाट वेगाने धावणाऱ्या वाहनांच्या अपघाताची शक्यता पाहता या रोडवर गतीरोधक बसविण्याची मागणी या परिसरातील नागरिकांकडून करण्यात येत होती. या मागणीचा पाठपुरावा नगरसेवक विलास भंडारे तथा भावी नगरसेवक युवासेनेचे शहराध्यक्ष राणा ऊर्फ विजयसिंह हजारी यांनी नगरपंचायतकडे सातत्याने केला. त्यांच्या या प्रयत्नांना यश आले असून,या मागणीची माहूर नगरपंचायतचे कर्तव्यदक्ष नगराध्यक्ष फिरोज दोसानी यांनी तातडीने दखल घेऊन आज या रस्त्यावर अपघातप्रवण अशा चार ठिकाणी गतीरोधक बसवून दिले.
कपिलनगर मधून जाणाऱ्या कपिलेश्वर महादेव मंदिर ते बाबा सोनापिर दर्गा रोडवर सतत भाविकांच्या वाहनांची वर्दळ असते. तसेच या रस्त्यावरून शासकीय आश्रमशाळा,आयटीआय व इतरही शाळा, कॉलेज, वसतीगृह व शासकीय कार्यालये असल्याने शिक्षक, कर्मचारी व विद्यार्थ्यांच्या वाहनांची मोठ्या संख्येने येजा सुरू असते. परंतु, गजबजलेल्या या रस्त्यावर कुठेही गतीरोधक बसविण्यात आला नव्हता. त्यामुळे अनेकवेळा छोटेमोठे अपघात होत असे. हे अपघात टाळण्यासाठी याठिकाणी गतीरोधक बसविण्याची मागणी नगरसेवक विलास भंडारे व भावी नगरसेवक शिवसेनेचे शहरप्रमुख राणा यांनी नगरपंचायतकडे सातत्याने पाठपुरावा करून लावुन धरली होती. या मागणीची विकासप्रिय नगराध्यक्ष फिरोज दोसानी यांनी दखल घेऊन आज रविवार दिनांक ०१ फेब्रुवारी रोजी कपिलेश्वर महादेव मंदिर, शिव-प्रताप चौक, तलाठी कार्यालय,कोडगीलवार यांच्या घराजवळ अशा अपघातप्रवण चार ठिकाणी गतीरोधक टाकून दिले.
यामुळे नगराध्यक्ष दोसानी, मुख्याधिकारी विवेक कांदे यांचे नगरसेवक विलास भंडारे तथा शिवसेना शहरप्रमुख राणा यांनी नागरिकांच्या वतीने आभार मानले असून, याकामी सातत्याने पाठपुरावा करणारे नगरसेवक भंडारे व भावी नगरसेवक राणा यांचे परिसरातील नागरिकांकडून अभिनंदनासह आभार मानले जात आहे.यावेळी नगरसेवक विलास भंडारे,शिवसेना शहरप्रमुख राणा,जावेद दोसानी,पवन शर्मा,यश शेवाळे, भावेश शेवाळे यांची प्रामुख्याने उपस्थिती होती.
