दिवंगत अभिनेता लक्ष्मीकांत बेर्डे ऊर्फ ‘लक्ष्या’च्या चाहत्यांसाठी एक आनंदाची बातमी आहे. ‘झपाटलेला ३’ या सिनेमाची तयारी सुरू झाली असून, ‘एआय’ या अत्याधुनिक तंत्रज्ञानाच्या मदतीनं चाहत्यांच्या भेटीला मोठ्या पडद्यावर खुद्द ‘लक्ष्या’ येण्याची शक्यता आहे! या निमित्तानं मराठी सिनेमात पहिल्यांदाच ‘एआय’चा वापर करण्यात येणार असल्याचं कळतंय. कारण ‘झपाटलेला ३’ चित्रपटाच्या निर्मितीच्या हालचालीला वेग आला आहे. हॉरर-कॉमेडी जॉनर असलेल्या या चित्रपटाचं गारुड गेल्या तीन दशकांपासून प्रेक्षकांवर आहे. आता या गाजलेल्या सिनेमाच्या भागाची चाहत्यांना उत्सुकता आहे.
महेश कोठारे आणि लक्ष्मीकांत बेर्डे ही मनोरंजनसृष्टीतील लोकप्रिय जोडगोळी. या दोघांनी अनेक अफलातून सिनेमे चाहत्यांना दिले, जे आजही तितक्याच आवडीनं पाहिले जातात. ‘झपाटलेला’ त्यापैकीच एक. या सिनेमाच्या तिसऱ्या भागाचं पोस्टर नुकतंच प्रदर्शित करण्यात आलं असून २०२५मध्ये तो प्रदर्शित होण्याची शक्यता आहे.
लक्ष्या मामाची एन्ट्री ?
‘आर्टिफिशिअल इंटेलिजन्स’चा वापर करून लक्ष्मीकांत बेर्डेचं पात्र ‘रिक्रिएट’ करायचे प्रयत्न केले जात असून, त्या दृष्टीनं कामही सुरू झालं आहे’, असं प्रसिद्ध दिग्दर्शक महेश कोठारे यांनी एका कार्यक्रमात नुकतंच सांगितलं. ‘झपाटलेला’ या सिनेमामधून तात्या विंचू हे ‘आयकॉनिक कॅरेक्टर’ लोकप्रिय झालं. दिलीप प्रभावळकरांनी हे पात्र आणखी उंचीवर नेलं. या सिनेमाचा तिसरा भाग तांत्रिकदृष्ट्या दर्जेदार करण्याचा टीमचा मानस आहे. तिसऱ्या भागात ‘एआय’च्या वापरातून लक्ष्मीकांत बेर्डे पडद्यावर पुन्हा जादू करतो की काय याबाबत उत्सुकता आहे खरी; पण पुढील माहिती अद्याप तरी गुलदस्त्यात ठेवण्यात आली आहे.
कलाकार कोण कोण ?
दरम्यान, ‘झपाटलेला’, ‘झपाटलेला २’ या दोन कलाकृतींप्रमाणे ‘झपाटलेला ३’चंही दिग्दर्शन महेश कोठारे हेच करणार आहेत. या सिनेमात अभिनेता आदिनाथ कोठारे मुख्य भूमिकेत दिसेल. तात्या विंचूदेखील नव्या रुपात प्रेक्षकांना पुन्हा एकदा घाबरवायला सज्ज होणार असल्याचं समजतं. याविषयी महेश कोठारे म्हणाले की, ‘झपाटलेला सिनेमाच्या फ्रेंचायझीमधील दोन सुपरहिट चित्रपट दिल्यानंतर त्याच ताकदीचा पुढील चित्रपट देण्यासाठी आम्ही बांधील आहोत. ‘झपाटलेला ३’च्या कथानकाची भट्टी एकदम जमून आली असून हा चित्रपट प्रेक्षकांसाठी एक धमाल प्रवास ठरणार आहे. सिनेमाच्या चित्रीकरणाला या वर्षाच्या अखेरीस प्रारंभ होणार आहे.’
