सोलापूर – बोला बोला एकदा भक्तलिंग हर्र बोला हर्र श्री सिद्धेश्वर महाराज की जय… जय घोषाने सारा परिसर दुमदुमला होता..मिरवणूक मार्गावर आकर्षक रांगोळीच्या पायघड्या, बँड ढोलीबाजा आणि कृत्रिम हत्ती चिमुकलांचे लक्ष वेधून घेत होते. बाराबंदी पोशाख परिधान केलेले चिमुकले बालक मिरवणूक मार्गावर श्रींचे दर्शन घेण्यासाठी उपस्थित होते. रस्त्याचे दुतर्फा भाविकांची एकच गर्दी होती.. औचित्य होते, ग्रामदैवत श्री शिवयोगी सिद्धरामेश्वर महाराजांच्या अक्षता सोहळ्याचे….
ग्रामदैवत श्री शिवयोगी सिद्धरामेश्वर महाराजांच्या अक्षता सोहळ्यासाठी मानाची पालखी आणि सातही नंदीध्वज यात्राप्रमुख हिरेहब्बू यांच्या वाड्यातून सकाळी साडेआठ वाजण्याच्या सुमारास विधिवत धार्मिक विधी संपन्न केल्यानंतर अक्षता सोहळ्यासाठी मिरवणूक मार्गावर मार्गस्थ झाले. या मिरवणूक मार्गावर विविध मानकऱ्यांना धर्माध्वज, पंचरंगीध्वज, बैलगाडी, दिवटे, आणि कुंभार मानकराकडे मातीचे गाडगे सुपूर्द करण्यात आले. मंगल वाद्यांच्या तालावर आणि श्रींच्या मधुर गीतांवर मिरवणूक मार्गस्थ झाली. ठिकठिकाणी भाविकांकडून मानांच्या पालखीचे तसेच सातही नंदी ध्वजाचे पूजन करण्यात आले. काहींनी खारीक खोबऱ्याचे तर काहींनी लिंबूचे हार मानाच्या नंदीध्वजांना अर्पण केले. मुखी सिद्धरामेश्वरांचा जयघोष करत मिरवणूक हळूहळू अक्षता सोहळ्यासाठी मार्गस्थ झाली. रस्त्याच्या दुतर्फा महिला भाविकांचे औक्षणाचे ताट घेऊन गर्दी होती. प्रत्येक महिला श्रींचे दर्शन घेण्यासाठी तसेच ओवाळणी करण्यासाठी आसुसलेले होते. भाविकांनी पालखीतील श्रींच्या प्रतिमेचे पूजन करून त्यांना पुष्प अर्पण केले. तर मानाच्या नंदीध्वजाला देखील हार अर्पण करून पूजा केली.
दरम्यान, हिरेहब्बू यांच्या वाड्यातून सुरू झालेली ही मिरवणूक कुंभारवाडा, दाते पंचांग, दत्त चौक, सोन्या मारुती चौक जुनी फौजदार चावडी, माणिक चौक, आजोबा गणपती, विजापूर वेस, जुनी कलेक्टर कचेरी येथे सरकारी आहेर देण्यात आला. त्यानंतर मार्कंडे मंदिर, सिद्धेश्वर प्रशाला मार्गे श्री सिद्धेश्वर मंदिराकडे मार्गक्रमण केली. यावेळी नंदीध्वजाच्या मागोमाग अनेक भाविक मार्गस्थ झाले. यावेळी सर्वत्र आनंदाचे आणि प्रसन्नतेचे वातावरण होते.
चिमुकल्यांनी परिधान केला बाराबंदी पोशाख
अक्षता सोहळ्यासाठी मार्गावर चिमुकल्यांनी पारंपारिक श्रींचा बाराबंदी पोशाख परिधान केला होता. हातामध्ये छोटा नंदीध्वज घेऊन श्रींच्या पालखीचे दर्शन घेतले. यावेळी महिला देखील पारंपारिक वेशभूषामध्ये श्रींच्या दर्शनासाठी उपस्थित होत्या.
अक्षता सोहळ्याच्या मिरवणूक मार्गावर कृत्रिम हत्तीने लक्ष वेधून घेतले
श्री सिद्धरामेश्वर यांच्या अक्षता सोहळ्याच्या मिरवणुकीसाठी सालाबाद प्रमाणे यंदाच्या वर्षी देखील हळदे बँड, तसेच इतर बँड आणि ढोलीबाजादेखील उपस्थित होते. यांचे गीत गाऊन मंगलमय वातावरण तयार केले होते. याच मिरवणूक मार्गावर हाके बंधू यांच्याकडून कृत्रिम हत्ती साकारण्यात आला होता. त्या हत्तीवर सिद्धरामेश्वरांची प्रतिमा विराजित करण्यात आली होती. हा श्रींचा कृत्रिम हत्ती सर्वांचे लक्ष वेधून घेत होते. चिमुकल्यांनी कुतूहलाने हत्ती सोबत फोटो काढले.
संस्कार भारतीच्या वतीने आकर्षक रांगोळीच्या पायघड्या
सालाबाद प्रमाणे यंदाच्या वर्षी देखील संस्कार भारती या संस्थेच्या वतीने मिरवणूक मार्गावर आकर्षक अशी रांगोळी साकारण्यात आली होती. हिरेहब्बू यांच्या वाड्यापासून ते संमती कट्टा अक्षता सोहळ्याच्या मिरवणूक मार्गावर सर्वत्र रांगोळीच्या पायघड्या साकारण्यात आल्या होत्या.
