टाटा समूहाच्या शेअर्सवर शेअर बाजारातील गुंतवणूकदारांची बारीक नजर असते. भारतीय शेअर बाजाराने चढउताराला मागे टाकत पुन्हा एकदा तेजीने व्यवहार सुरू केला आहे. अशा स्थितीत जर तुम्ही गुंतवणुकीसाठी स्टॉकच्या शोधात असाल तर टाटा ग्रुपच्या कमी चर्चित स्टॉकवर लक्ष ठेवून राहा ज्याने बुधवारच्या सत्रात नवीन उच्चांक नोंदवला आहे. बुधवारी बीएसई (बॉम्बे स्टॉक एक्सचेंज) वर टाटा समूहाची कंपनी तेजस नेटवर्कच्या शेअर्सनी ७.३ टक्क्यांनी मुसंडी मारली.
उत्पादन क्षेत्राच्या डिजिटल परिवर्तनाला चालना देण्यासाठी सरकारच्या योजनेला पाठिंबा देण्यासाठी फायबरकनेक्ट इटलीमधील औद्योगिक क्षेत्रांमध्ये सेवा प्रदान करण्याचा प्रयत्न करीत आहे ज्यात सध्या ब्रॉडबँड पायाभूत सुविधांचा अभाव आहे. इटालियन कंपनीने यासाठी प्रादेशिक आणि किरकोळ इंटरनेट सेवा प्रदात्यांच्या भागीदारीभोवती एक अद्वितीय व्यवसाय मॉडेल विकसित केले आहे.
फायबरकनेक्टच्या राष्ट्रव्यापी FTTP (फायबर-टू-द-प्रिमाइस) रोलआउटसाठी तेजस ऑप्टिकल नेटवर्किंग आणि ब्रॉडबँड ऍक्सेस उत्पादनांचा एकमेव पुरवठादार आहे, कंपनीने १७ ऑक्टोबर रोजी एक्सचेंज फाइलिंगमध्ये म्हटले. फायबरकनेक्ट ही इटलीमधील रिटेल टेलिकॉम इन्फ्रास्ट्रक्चर कंपनी आहे. दरम्यान, तेजस नेटवर्क्सचे मुख्य कार्यकारी अधिकारी आणि व्यवस्थापकीय संचालक आनंद अथ्रेया म्हणाल्या की, “फायबरकनेक्टने आमची वाहक-श्रेणी ऑप्टिकल आणि ब्रॉडबँड ऍक्सेस उत्पादने वापरून इटलीमध्ये संपूर्ण नेटवर्क तयार करण्याचा निर्णय घेतल्याचा आम्हाला आनंद आहे.’’
तेजस नेटवर्क डेटा नेटवर्किंग उत्पादने आणि नेटवर्क ऑप्टिकल उत्पादने तयार करण्यासह कंपनी ७५ हुन अधिक देशांमध्ये दूरसंचार सेवा प्रदान करते. तसेच ताज्या शेअरहोल्डिंग डेटानुसार, विदेशी संस्थागत गुंतवणूकदारांनी (एफआयआय) तेजस नेटवर्कमधील त्यांचा हिस्सा सप्टेंबरच्या तिमाहीत ११.११% पर्यंत वाढवला, जो मागील तिमाहीतील १०.९ टक्के होता. तसेच देशांतर्गत संस्थात्मक गुंतवणूकदारांनी (DIIs) सप्टेंबरच्या तिमाहीत त्यांचा हिस्सा मागील तिमाहीत ३.८९% वरून वाढवून ४.०३ टक्क्यांवर पोहोचला आहे.
