माहूर – एनबीईएमएसद्वारे घेण्यात आलेल्या फॉरेन मेडिकल ग्रॅज्युएट एक्झामिनेशन-एफएमजीई डिसेंबर २०२५ परीक्षेचा निकाल नुकताच जाहीर झाला असून, किर्गिजस्तान येथे एमबीबीएसचे वैद्यकीय शिक्षण पूर्ण केलेल्या माहूर तालुक्यातील आष्टा येथील कु. वैष्णवी गजाननराव सोनटक्के हिने ह्या परीक्षेत ३०० पैकी १९८ गुण मिळवत घवघवीत यश संपादन केले आहे.या यशामुळे तिचे डॉक्टर होण्याचे स्वप्न पूर्ण झाले असून माहूर तालुक्याच्या वैद्यकीय क्षेत्राच्या शिरपेचात मानाचा तुरा खोवला गेला आहे. वैष्णवी ही पत्रकार संजय सोनटक्के यांची पुतणी आहे.
एफएमजीई (फॉरेन मेडिकल ग्रॅज्युएट एक्झामिनेशन) ही
भारत सरकारच्या आरोग्य आणि कुटुंब कल्याण मंत्रालयाच्या अंतर्गत एक स्वायत्त संस्था असलेल्या व
भारतात पदव्युत्तर वैद्यकीय शिक्षण आणि परीक्षांचे उच्च व एकसमान मानकीकरण करण्याचे काम करणाऱ्या
नॅशनल बोर्ड ऑफ एक्झामिनेशन्स इन मेडिकल सायन्सेस अर्थात ‘राष्ट्रीय वैद्यकीय विज्ञान परीक्षा मंडळ’ (एनबीईएमएस) द्वारे परदेशातून एमबीबीएस पूर्ण करणाऱ्या भारतीय नागरिक किंवा ओसीआय कार्डधारकांसाठी आयोजित केली जाणारी अनिवार्य पात्रता परीक्षा आहे. ही पात्रता परीक्षा वर्षांतून (जून आणि डिसेंबर) संगणक पद्धतीने घेतली जाते.
किर्गिजस्तानमधून एमबीबीएस पूर्ण करणाऱ्या भारतीय विद्यार्थ्यांसाठी एफएमजीई उत्तीर्ण होणे अनिवार्य आहे. ३०० पैकी १५० गुण (५०%) मिळवून ही पात्रता परीक्षा उत्तीर्ण करणे, भारतात वैद्यकीय व्यवसाय करण्यासाठी आवश्यक आहे. भारतीय नागरिक किंवा ओसीआय कार्डधारक ज्यांनी किर्गिजस्तान किंवा परदेशातून एमबीबीएस पदवी पूर्ण केली आहे हे या पात्रता परीक्षेसाठी पात्र ठरतात.
ही परीक्षा उत्तीर्ण झाल्यानंतरच भारतात डॉक्टर म्हणून प्रॅक्टिस करण्यासाठी परदेशी पदवीधरांना तात्पुरती किंवा कायमस्वरूपी नोंदणी (रजिस्ट्रेशन) मिळते. अशा या महत्त्वाच्या एफएमजीई पात्रता परीक्षेत माहूरच्या आष्टा या खेडेगावातील वैष्णवी हिने यशस्वी होत आष्टा सारख्या ग्रामीण भागातून प्रथम महिला डॉक्टर होण्याचा बहुमान मिळवत वैद्यकीय क्षेत्रात इतिहास घडविला आहे.
वैष्णवी हिचे प्राथमिक शिक्षण जिल्हा परिषद प्राथमिक शाळा तोळा तांडा आष्टा, त्यानंतर दहावीपर्यंत विद्यालयीन शिक्षण हे साखळे विद्यालय, उमरखेड व कनिष्ठ महाविद्यालयीन शिक्षण हे श्री शंकरराव चव्हाण विद्यालय आष्टा येथे झाले झाले असून, एमबीबीएसचे वैद्यकीय शिक्षण हे विदेशामध्ये किर्गिजस्तान येथे सप्टेंबर २०२० ते मे २०२५ मध्ये यशस्वीपणे पूर्ण झाले आहे. अर्थात परदेशात राहून शिक्षण घेत असताना आर्थिक,शैक्षणिक व वैयक्तिक अशा अनंत अडचणींचा सामना तीला करावा लागला. अशाही विपरीत परिस्थितीवर मात करून हार न मानता आपले डॉक्टर होण्याचे ध्येय कायम ठेवत एफएमजीई सारख्या कठीण व स्पर्धात्मक परीक्षेमध्ये उत्तीर्ण होण्यासाठी तिने दिवस रात्र अभ्यास करून अथक परिश्रम घेऊन पहिल्याच प्रयत्नात ३०० पैकी १९८ गुण घेऊन नेत्रदीपक यश प्राप्त करत आपली व आपल्या आईबाबांसह संपूर्ण सोनटक्के परीवाराची स्वप्नपूर्ती केली आहे.
डॉ.कु.वैष्णवी हिने प्रचंड संघर्ष, जिद्द आणि चिकाटी आणि कठोर परिश्रमातून मिळविलेल्या या यशाबद्दल आष्टासह तालुक्याचे ज्येष्ठ राजकीय नेते नामदेवराव केशवे,बाबाराव केशवे,अनंत केशवे, माजी नगराध्यक्ष तथा नगरसेवक,प्राचार्य राजेंद्र केशवे, डॉ.निरंजन केशवे, वसंतराव पिंगळे,उमाजी कराळे,गोपीनाथ सुरोशे, नगरसेवक प्रा.विलास भंडारे, प्रा.सुजित केशवे, अशोक सोळंके, चेतन कराळे, किरण वंजारे,कोथळकर सर, पावडे सर,प्रा.अजय राठोड, प्रा. प्रशांत कदम,प्रा.तुषार तास्के, प्रा. कोषटवार मॅडम यासह अनेकांनी तीचे अभिनंदन करत पुढील यशस्वी वाटचालीसाठी शुभेच्छा दिल्या आहेत. कितीही कठीण असले तरी वैष्णवी हिने केलेल्या मेहनतीच्या जोरावर यश खेचून आणता येते हे सिद्ध करून दाखविले आहे.हे उच्च शिक्षण घेणाऱ्या तमाम विद्यार्थ्यांसाठी प्रेरणादायी आहे.
माहूर सारख्या जेमतेम वैद्यकीय सेवा सुविधा उपलब्ध असलेल्या आदिवासी बहुल मागासलेल्या भागात एमबीबीएस डॉक्टरची नितांत गरज असून, डॉ. वैष्णवी सोनटक्के यांनी आता माहूर येथेच हॉस्पिटल उभारुन येथील गोरगरिब रुग्णांना आरोग्य सेवा सुविधा उपलब्ध करून द्याव्यात, अशी अपेक्षा नागरिकांकडून व्यक्त केली जात आहे.
