दक्षिण आफ्रिकेमधील जोहान्सबर्ग शहरातील पाच मजली इमारतीला गुरुवारी पहाटे भीषण आग लागली होती. ती आग आटोक्यात आली असली तरी तब्बल ६३ जणांचा मृत्यू झाला आहे, तर अन्य ५० जण जखमी झाल्याची माहिती आहे. दरम्यान मृतांचा आकडा वाढण्याची भीती व्यक्त केली जात आहे. जखमींना जवळच्या रूग्णालयात दाखल करण्यात आले आहे.
जोहान्सबर्ग प्रशासनाने एक्स (ट्विटर) हँडलवरून याबाबत माहिती दिली आहे. जोहान्सबर्ग शहराच्या सेंट्रल बिझनेस डिस्ट्रिक्टमध्ये आज (३१ ऑगस्ट) ही घटना घडली. आग लागण्याचं कारण स्पष्ट नसून, याबाबत तपास सुरू आहे.
जोहान्सबर्ग इमर्जन्सी मॅनेजमेंट सर्व्हिसेसचे प्रवक्ते रॉबर्ट मुलौझी यांनी म्हटले आहे, आग लागलेल्या इमारतीमधून ६० हून अधिक जणांचे मृतदेह बाहेर काढण्यात आले आहेत. कित्येक जणांवर उपचार सुरू आहेत. इमारतीमध्ये आणखी काही लोक अडकले असून, बचावकार्य सुरू आहे. मृतांमध्ये एका लहान मुलाचाही समावेश आहे. आगीची भीषणता पाहता मृतांची संख्या वाढण्याची भीतीही त्यांनी व्यक्त केली. आग जवळपास आटोक्यात आली आहे. मात्र, अजूनही धूर पूर्णपणे गेलेला नाही. बऱ्याच ठिकाणी कुलिंगचं काम सुरू आहे. या इमारतीमध्ये सुमारे २०० बेघर लोक आसरा घेऊन राहत होते.
ही संपूर्ण इमारत आता काळी पडली असून सर्व खिडक्यांमधून धूर निघत आहे. इमारतीमधील सर्व लोकांना दूर राहायला सांगितले आहे.
