मुंबई: नांदेड इथल्या शासकीय वैद्यकीय महाविद्यालय व रुग्णालयाचे अधिष्ठाता डॉ. श्याम वाकोडे यांना खासदार हेमंत पाटील यांनी शौचालय स्वच्छ करायला लावले. सर्वच स्तरातून या घटनेचा निषेध करण्यात येतोय.या घटनेवर सध्या विविध प्रतिक्रिया उमटताना दिसत आहेत. या घटनेवर आता अभिनेत्री केतकी चितळे हिनं पोस्ट शेअर केली आहे.
मराठी सिनेसृष्टी अभिनेत्री केतकी चितळे सोशल मीडियावर सक्रिय असते. तिच्या सोशल मीडियापोस्टमुळं अनेकदा ती अडचणीत सापडली आहे, तर एकदा तिला तुरुंगातही जावं लागलंय. आता तिनं रुग्णालयाच्या डीनला शौचालय स्वच्छ करायला लावल्याच्या घटनेचं अप्रत्यक्षरित्या समर्थन केलंय.
काय आहे केतकी चितळेची पोस्ट?
आता एका हॉस्पिटल डीनला हॉस्पिटलमधील संडास साफ करा हे त्याची जात बघून सांगायचे तर!आणि तरीही राव आपल्याकडे खोट्या अॅट्रोसिटी केसेस टाकल्या जात नाहीत.
जय हो अॅट्रोसिटी अॅक्ट १९८९, असं केतकीनं तिच्या पोस्टमध्ये म्हटलंय. ती पुढं लिहिते की, आम्ही सामान्य माणसांवर काय तर आता कुठल्याही पदाला सोडणार नाही.
#uniformcriminallaw #onenationonelaw असे दोन हॅशटॅग वापरले आहेत. अशी पोस्ट केतकी चितळेनं केली आहे. याबरोबर तिने युनिफॉर्म क्रिमिनल लॉ आणि वन नेशन वन लॉ असे हॅशटॅग दिले होते.
काय आहे नेमकं प्रकरण?
खासदार हेमंत पाटील यांनी नांदेड वैद्यकीय महाविद्यालयाच्या अधिष्ठात्यांना रुग्णालयातील शौचालय स्वच्छ करण्यास भाग पाडल्याच्या कृतीवर वैद्यकीय क्षेत्रातून संताप व्यक्त होत आहे. हेमंत पाटील यांनी माफी न मागितल्यास काम बंद आंदोलन करावं लागेल, असा इशारा मार्ड या निवासी डॉक्टरांच्या संघटनेनं दिला आहे. खासगी डॉक्टरांच्या आयएमए या संघटनेकडूनही या कृत्याचा निषेध करण्यात आलाय.
काय म्हणाले हेमंत पाटील?
या प्रकरणावर बोलताना हेमंत पाटील म्हणाले की, मी त्यांच्यावर कुठल्या प्रकारचा जाती वाचक शब्दांचा उल्लेख केलेला नाही. मी शिवीगाळ केलेली नाही. मी त्यांना आरे तुरे बोललेलो नाही अपमान केलेला नाही. स्वच्छतेसाठी एक तास झाडू संपूर्ण देशानं हाती घेतला होता. माझ्यावर जर गुन्हा दाखल होत असेल तर होऊद्या, समाज पुढे काय करायचं ते ठरवेल.
