ज्या विवाह सोहळ्याची सर्व चाहते आतुरतेने वाट पाहत होते तो अखेर आनंदाने निर्विघ्नपणे पार पडला आहे. अभिनेता सिद्धार्थ मल्होत्रा आणि अभिनेत्री कियारा अडवाणी यांनी 7 फेब्रुवारी 2023 रोजी आयुष्यभरासाठी एकमेकांचा हात हातात घेत सात जन्म एकत्र राहण्याच्या आणाभाका अग्निदेवतेच्या साक्षीने घेतल्या आहेत. राजस्थानमध्ये प्रायव्हेटली काही खास लोकांच्या उपस्थितीमध्ये त्यांनी आपली लग्नगाठ बांधली. जगभरातून दोघांना शुभेच्छांचे संदेश दिले जात आहेत. लग्न हा कोणत्याही जोडप्याच्या आयुष्यातला सर्वात अविस्मरणीय क्षण असतो.
मग जोडपे सामान्य असो वा सेलिब्रिटी कपल असो. पण सेलिब्रिटी कपल्सचे लग्न म्हटले की ते कितपत टिकेल याची सर्वाधिक चर्चा होते. कारण अहो इतिहासच तसा आहे. फार कमी सेलिब्रिटी कपल्स असे आहेत ज्यांना आपले लग्न टिकवता आले आहे. मग कियारा आणि सिद्धार्थच काय? त्यांचं वैवाहिक आयुष्य कसं असेल? ज्योतिष नवीन खंतवाल यांनी कियारा आणि सिद्धार्थ यांची रास आणि जन्मांक यांचा आधार घेऊन काही रोचक गोष्टी सांगितल्या आहेत.
नावानुसार सिद्धार्थची राशी कुंभ आणि कियाराची मिथुन आहे. या दोन्ही राशी वायु तत्वाच्या आहेत, त्यामुळे या दोन्ही राशी काही बाबतीत अगदी सारख्याच असतील. उदाहरणार्थ, रिलेशनशिपमध्ये असतानाही हे दोघे एकमेकांना पर्सनल स्पेस देतील. ते एकमेकांच्या मतांचा पूर्ण आदर करतील. हे दोघे कधीही एकमेकांवर वर्चस्व गाजवण्याचा प्रयत्न करणार नाहीत. आयडियल कपल्स सारखे दोघे एकमेकांना समजून घेतील असेच या अनुमानावरून दिसते आहे.
कुंभ राशीच्या लोकांची वैचारिक क्षमता चांगली असते, तर मिथुन राशीच्या लोकांची कल्पनाशक्ती चांगली असते. म्हणजेच, सिद्धार्थची विचारप्रक्रिया चांगली आहे, तसेच कियाराची कल्पनाशक्ती आहे, ज्यामुळे दोघेही एकत्र काहीतरी नवीन करू शकतात. मिथुन आणि कुंभ राशीमध्ये चांगले मानसिक संबंध देखील दिसून येतात. त्यामुळे कियारा आणि सिद्धार्थ यांच्यात वादाची परिस्थिती असली तरी दोघेही एकमेकांशी एकनिष्ठ राहतील. या दोन राशीच्या लोकांमध्ये प्रेम आणि विश्वास निर्माण होण्यासाठी थोडा वेळ लागतो, याचा अर्थ दोघांना आणखी काही वेळ एकत्र घालवावा लागेल.
अंकशास्त्रानुसार कियाराची मुळ अंक 4 आहे आणि सिद्धार्थचा मुळ अकं 7 आहे. अंकशास्त्रानुसार या दोन अंकांना चांगले पार्टनर मानले जाते. त्यांच्या नात्यात उत्स्फूर्तता, सहजता आणि आनंद दिसून येतो. म्हणजेच कियारा आणि सिद्धार्थचे वैवाहिक आयुष्य खूप चांगले जाणार आहे. शिवाय दोघेही स्वभावाने खूप जास्त समजूतदार असल्याने त्यांच्यात वादाची स्थिती निर्माण होणार नाही असेच सर्वजण म्हणत आहेत.
