‘मिस्टर परफेक्शनिस्ट’ म्हणजे सुपरहिट सिनेमा हे समीकरण गेल्या काही वर्ष काहीचं चुकल्यासारखं दिसून आलं. गेल्यावर्षी आलेला ‘लाल सिंह चड्ढा’ बॉक्सऑफिसवर फार चालला नाही. त्यामुळं लाखो प्रेक्षकांची त्यानं निराशा केली असं बोललं गेलं. विचार करून, अभ्यास करून वर्षातून एखादाच चित्रपट करणारा सुपरस्टार ही आमिर खानची ओळख. ‘मिस्टर परफेक्शनिस्ट’ची निवड सहसा चुकत नाही. आजवर अनेक चित्रपटांतून ते दिसून आलं; पण ‘लाल सिंह चड्ढा’नं मात्र हे खोटं ठरवलं. त्यानंतर आमिरनं त्याच्या आगामी सिनेमाची घोषणा केली नव्हती. आमिर आता मोठा ब्रेक घेणार असल्याचंही म्हटलं गेलं. पण आता त्यानं एक मोठी घोषणा केली आहे.
नुकताच प्रदर्शित झालेला अभिनेता सनी देओलचा गदर २ सिनेमा प्रचंड गाजला. बॉक्स ऑफिसवर या सिनेमानं तब्बल ५०० कोटींच्यावर कमाई केली आहे. त्यामुळं आजही सनी देओलची क्रेझ किती आहे, हे दिसून आलं. आणि म्हणून आमिरनंही त्याची लोकप्रियता पाहून त्याच्यासोबत आगामी सिनेमाची घोषणा केली आहे. आमिरनं नुकतीच एक नोट शेअर करत या आगामी सिनेमाबद्दल सांगितलंय.
मी आणि आमिर खान प्रोडक्शनची संपूर्ण टीम…आम्हाला हे सांगताना प्रचंड आनंद होतोय की, अभिनेता सनी देओल यांच्यासोबत आमचा आगामी सिनेमा येतोय. राज कुमार संतोषी हे या सिनेमाचे दिग्दर्शक असतील, तर सिनेमाचं नाव ‘लाहोर, १९४७’ असं आहे. सनी तसंच माझ्या आवडत्या दिग्दर्शकांपैकी एक असलेले राज कुमार संतोषी यांच्यासोबत काम करण्यासाठी आम्ही उत्सुक आहोत, असं आमिरनं म्हटलं आहे.
खरं तर आमिर आणि सनी दोघांनीही बॉलिवूडचं दोन दशकं जागवली, सनीनं काही वर्षे ब्रेक घेतला होता. तर आमिर मात्र वर्षाला एखदा सिनेमा तरी करत होताच. १९९०च्या दरम्यान, दोघांची बॉक्स ऑफिसवर अनेकदा टक्कर व्हायची. आमिर खानचा गाजलेला ‘दिल’ आणि सनी देओलचा घायल हे दोन्ही सिनेमे एकाच दिवशी प्रदर्शित झाले होते. तर त्याच्यानंतर राजा हिंदुस्तानी आणि घातक यांची बॉक्स ऑफिसवर टक्कर झाली होती. इतकंच नव्हे तर बॉलिवूडमधला सगळ्यात मोठा बॉक्स ऑफिस क्लॅश म्हणजे आमिरचा लगान आणि सनीचा गदर…दोन्ही सिनेमांनी बॉक्स ऑफिस गाजवलं होतं.त्यामुळं हे दोघे एकत्र येऊन आता काय जादू करणार हे पाहणं उत्सुकतेचं ठरणार आहे.
